Otros años per estes feches, los periódicos y los informativos asturianos ufiertábennos a diariu les estadístiques de pesca de salmón, coles semeyes de los arguyosos pescadores y con publirreportaxes a midía sobro’l paraísu ástur de la pesca de salmón. Alcaldes, políticos varios, hosteleros, conseyeros, presidentes d’asociaciones, etc, etc, rellataben los sos llogros y apostaben pol negociu y los millones d’euros qu’apurriría la pesca del salmón a la maltratada economía asturiana.
Pero esti añu, eses páxines rellumen pola so ausencia, silenciu casi absolutu, como si nun hubiera temporada o se suspendiera.
Y vais preguntar qué ta pasando. La respuesta ye bien cenciella. La temporada de pesca con muerte entamó’l 11 d’abril, y toles captures del mes algamaron la pimpana cifra de ¡¡¡¡ 23 PECES !!!!, probablemente’l peor entamu de temporada de la hestoria.

Nel Esva, como yera esperable, nun se pescó nin unu, pero los pescaores siguen ensin querer que se vede’l ríu.
Yá nun cuelen les escuses de les mabees, les garces y les llondrigues, nin que la pesca nel mar escosa los salmones (porque anguañu esta pesca yá nin siquier se prautica). Señores, el salmón escasta, les repoblaciones nun furrulen y amás son perxudiciales. O se veda’l salmón darréu o va desaniciase n’unos pocos años.
Adios a la pesca, adiós a la pita los güevos d’oru y lo peor de too, adiós a una especie única, d’una población única nel mundu, que se va perder pa siempres por culpa del egoismu, l’avaricia y la babayada. Y de xacíu pola ineptitú d’una alministración impresentable qu’antepón los votos y los sillones a les evidencies científiques.