L’Asociación Alambique coincide con Andecha Astur nel pidimientu de condonación de les deldes por cobros indebíos a les persones en situación de vulnerabilidá social

L’Asociación Alambique denuncia que, dende va unos meses, lleven detectando munches situaciones estremes, en persones primero perceptores de Salariu Social y agora  en procesu d’incorporase a l’IMV; situaciones xeneraes principalmente pol caos de les alministraciones na xestión d’estes ayudes y pola incapacidá d’atender y resolver les situaciones en tiempu y forma. Xestión que foi a peor arriendes de la pandemia, n’enllantando l’atención telemática y nun tener una atención presencial para resolver les duldes y realizar les xestiones oportunes.

Énte la situación d’abandonu na que s’atopen les persones nuna situación de mayor precariedá económica y vulnerabilidá social nel so tratu cola Conseyería de Derechos y Bienestar Social, dende’l colectivu de llucha contra la esclusión a ALAMBIQUE empecipien una serie d’acciones coles que van denunciar públicamente estes situaciones.

Denuncien la situación d’indefensión na que s’atopen cientos de persones (nel últimu datu de la conseyería más de 800 unidaes económiques de convivencia) a les que dende va meses ya inclusive años nun se-yos actualiza les sos cuantíes del Salariu social, nin se-yos contesta a los allegamientos y recursos que plantegen; los requerimientos de la Conseyería, en cartes inesplicables onde se piden pagos por cobros indebíos de va años (tán recibiéndose pidimientos del añu 2013), con sumes y restes que nun cuadren nos requerimientos “Procediendo como si fora “el cobrador del frac””.
Tou ello vese agravao énte la imposibilidá de tener una atención presencial, viéndose los usuarios forciaos a comunicase cola alministración al traviés de solicitúes telemátiques complicaes y non siempres acesibles, enfrentándose coles mesmes a plazos de procedimientu alministrativu que nun tienen en cuenta la situación sanitaria nin cómo furrulen agora les alministraciones.
Con tou esto denuncien “la burocracia que se convierte nuna carrera de torgues, onde cada nueva torga ye un golpe que provoca ansiedá y mieu. Una burocracia que maltrata a les persones en situaciones más vulnerables“.
Acusen d’esti caos a la conseyera de Drechos Sociales y Bientar, “que promueve o caltien un procedimientu que nun da solución y complica entá más a les persones qu’intenten aportar a les ayudes y recursos sociales. Priorizando solamente los intereses económicos de la conseyería y dexando de llau la puesta en marcha de política sociales xustes y redistributives”.

Ente les sos desixencies p’acabar con esta situación ta la de l’actualización nel plazu máximu d’un mes de tolos espedientes pindios d’actualización del Salariu Social y la contestación nel mesmu plazu de tolos recursos y allegamientos presentaos polos beneficiarios del drechu al salariu social, la puesta en marcha de les solicitúes y contestaciones en procedimientu de llectura fácil pa que toes les persones puedan exercer los sos derechos al respective de l’alministración y la condonación de les deldes por cobros indebíos a les persones en situación de vulnerabilidá social.

Finalmente, revindiquen la puesta en marcha de la Renta Básica de les iguales como drechu pa toles persones entamando poles que s’atopen perbaxo la llende de la probitú.

Nuria Prendes

This work is licensed under a Creative Commons Attribution 4.0 International License.