Les cifres falen de siquier 47 muertos, más de 500 firios y alrodiu de dos mil sumíos en Colombia dende l’entamu la represión

Estos díes la tarrecible represión en Colombia franció parcialmente l’avezáu bloquéu informativu que s’acurre sobro la cotidiana violencia que soporta esti país. Faelo pola estrema brutalidá policial y la militarización dafechu de los territorios colombianos.

Les ONG Temblores y Indepaz denunciaron nun comunicáu 47 muertos nes protestes, más de 500 mancaos, 12 casos de violencia sesual y cerca dos mil sumíos, asina comu 356 casos d’intervenciones violentes en Colombia dende l’entamu de la represión y afirmen que “los homicidios fueron cometíos de magar una decisión del gobiernu nacional y de los mandos de la Fuerza Público de promover un usu desproporcionáu de la fuerciaa y tolerar l’usu d’armes de fueu como métodu de terror contra la protesta social”.

Mesmo asina, les noticies sobro lo que ta asocediendo en Colombia aporten con cuentagotes, siendo más lo que pue sabese al traviés de les redes sociales y los contautos personales que lo que tresciende a los grandes medios de comunicación, escudaos nel so avezáu silenciu cómpliz.

Siero destacóse  nestes décades pola so implicación con esti país, denunciando de cutio les violaciones de los drechos humanos, asesinatos y represión que son frecuentes en Colombia. Dacuando preséntense nel conceyu informes sobro esta situación y recíbense persones refuxaes colombianes escorríes pola so actividá.

Agora, fáense ecu de les demandes pa detener les masacres, convocando una concentración col llema de Siero con Colombia, que va tener llugar esti Martes 11 a les 20 hrs, delantre la Casa Conceyu

Redaición InfoAsturies