El Muséu del Pueblu d’Asturies robló un alcuerdu cola Fundación Asturies XXI para la creación d’un fondu d’elementos culturales sidreros, que s’inauguró cola donación d’un cartelu de principios del Sieglu XX
El director del Múséu del Pueblu d’Asturies, MPA, Xuacu López, robló col presidente de la Fundación Asturies XXI, Marcos Abel Fernández, un documentu pol que queda constituyíu un fondu museísticu nel centru, de conteníu rellacionáu cola sidra principalmente, y que quedó inauguráu cola donación d’un cartelu de sidra champagne de la marca ‘Pelayo’, de Fíos d’Antonio Arias, Corias de Pravia, realizáu na Litografía Nicolás Miralles de Barcelona escontra 1905. Esti fondu va dir amontándose dacuando, cuntando para ello col asesoramientu del propiu muséu.
Na so intervención, el director del MPA sorrayó la importancia del depósitu y estimó la iniciativa de la Fundación Asturies XXI, poniéndola como exemplu a siguir “para al caltenimientu y recuperación del patrimoniu históricu/artísticu asturianu”. Tamién destacó’l valor de la primer obra qu’inauguró dichu depósitu, tantu no que fai a el so valor artístico y patrimonial, como económicu.
Pela so parte, Marcos Abel Fernández, presidente de la Fundación Asturies XXI, allabó’l “importante ya imprescindible” trabayu que vien realizando’l MPA para’l caltenimientu y dignificación del patrimoniu del país, y estimó la so collaboración para la creación del mentáu fondu museísticu, reclamando un mayor protagonismu de les instituciones asturianes na necesaria recuperación y caltenimientu del patrimoniu asturianu. Tamién llamentó que, como nesti casu, eso dependa en bona midida de les iniciatives privaes, a les que consideró como “imprescindibles”. Coles mesmes Fernández fixo un llamamientu a la collaboración de toes elles con instituciones como’l MPA, “un auténticu exemplu y garantía na recuperación, caltenimientu y puesta en valor del patrimoniu material asturianu” manifestó.
Redaición InfoAsturies
This work is licensed under a Creative Commons Attribution 4.0 International License.
