Les midíes conteníes nel borraor pal prósimu cursu, que ta por aprobar, van tener que concretase darréu nel ámbitu autonómicu. Hasta agora, la Conseyería d’Educación asturiana caracterizóse por una sumisión al dictáu de les normes decretaes pol Gobiernu central 

Pal sindicatu d’ensiñantes asturianos, SUATEA, agora mesmo danse les condiciones pa caltener, consolidar y avanzar en midíes como l’amenorgamientu de ratios d’alumnáu per aula, l’aumentu de les plantiyes de profesoráu o la rebaxa de les hores d’actividá llectiva pal profesoráu de Primaria ya Infantil (como encamienta la llei).

Sicasí, temen que s’esbardie esta oportunidá; según los datos asoleyaos en dellos medios de comunicación, nel documentu borrador del Ministeriu d’Educación adelántrense una riestra instrucciones coles que dir entamando les llínees xenerales en materia de seguridá sanitaria previstes pal próximu cursu 2021-22.

Acordies los datos que se conocen, el Ministeriu llindaríase a caltener aquelles midies que nun suponen inversión y recularía, con finxos económicistes, hacia problemes previos al andanciu. Asina,  amenorgarien l’espaciu interpersonal pa subir la ratio otra vegada a 25 escolinos en primaria, pero calteniendo los grupos pómpara y la obligación de mazcaru pa los escolinos de magar los 6 años, ello ye posando la responsabilidá nos escolinos y retayando’l gastu públicu n’educación.

“De confirmase estos datos taríamos énte una oportunidá perdida de cara a garantizar un desendolcu progresivu del nuevu marcu llegal qu’introduz la LOMLOE. La retrógrada normalidá educativa, marcada pola Llei Wert, namá podrá superase adoptando disposiciones que dexen esaniciar vieyos errores y garanticen un fayadizu financiamientu”.

Les midíes conteníes nesi documentu, que ta por aprebar, nun tan presllaes, sinon qu’hai un marxe de maniobra pa los estremaos gobiernos territoriales que tienen la capacidá de concretalos. Sicasí, esto da poques esperances a los docentes, ya qu’hasta agora la Conseyería d’Educación asturiana caracterizóse por una sumisión al dictáu de les normes decretaes pol Gobiernu central.

Llucía F. Marqués

This work is licensed under a Creative Commons Attribution 4.0 International License.