Siento a muncha xente del campu amurniada col díe ente díe. Les grandes cadenes tán pagando precios risibles a les/los que producen y la burocracia va n’aumentu. Pero nun podemos escaecer que trabayamos la tierra que queremos y que ye esa mesma tierra la que nos alimenta. ¡Tenemos De tar arguyoses/os!
La selmana pasada un osu volvió entrar n’un de los nuesos casiellos. Una vegada más, foi’l primeru que prebó’l miel del añu. Compartir territoriu cola población d’osu más importante d’Europa, trai una mayor atención y cuidu, pero tien de suponer tamién una diferenciación nel productu final.
Daños de fauna, perda de colleches por xelu, xarazu o seca. Una gran parte de la sociedá, vive de llombu a los problemes a los que nos toca enfrentanos. Y la Alministración non siempres ta al altor. Pero perriba de too eso, facemos lo que nos gusta y trabayando la nuesa tierra, consiguimos que la cultura qu’hai acomuñada a ella, nun se pierda.
Tou esto qu’escribo ta perbién, pero ¿qué puedo faer yo que non vivu nel rural? El carru de la compra ye soberanu, nesti país hai munches/os llabradores y ganaderes/os, que siendo coherentes producen alimentos de calidá. Tienes una oportunidá ca díe de faer daqué por elles/ellos.
¡Nun lo duldes!, puedes sofitar a toa esa xente mercando lo que faen, en llugar de dir al supermercáu a enllenar la nevera de coses que se producen n’otros continentes. Quiciabes asina los territorios sigan vivos y ca vegada haiga más xente que vea nel campu un mediu de vida tan dignu como cualesquier otru.