Esti añu el Conceyu Repunantes escueye Llaviana como destín del so Congresu Nacional añal
El prósimu sábadu 22 de mayu va tener llugar nel Restorán El Pintu, na cai Llibertá númberu 11, en La Pola (conceyu Llaviana), el 8u Congresu Nacional de Repunantes.
El actu va emprimar sobro les 20:00 hores, cola bienllegada la xente participante (seyan socios o non). Ehí va entamase la entrega de los diplomes d’esti Congresu ya la robla los mesmos por parte’l Presidente del Conceyu Repunantes, D. David M.Rivas. L’asistencia al actu ye condición necesaria y abonda p’algamar el codiciáu Diploma de Repunante.
Nesti 8u Congresu Nacional de Repunantes, tamién va dase’l reconocimientu como Repunante d’Honor, a D. Xuan Nel Gonzali; ún los creadores del Congresu Repunantes, qu’esparde la so filosofía perdayuri con especial enfotu nel pallabru “sociollistos” pa nomar les polítiques arecistes, mudiste ya barbonistes nos caberos años pal país de nueso. Otru de los pallabros más apreciaos na cabera dómina por esti repunante ye’l de “covidianos” col que -con muncho ciñu, eso si- destaca les incongruencies diaries nel tratamientu públicu del andanciu.
L’actu de Reconocimientu del Repunante d’Honor ta calculáu pa les 21:00, cola presentación del 8u Congresu Nacional y la repunancia pública del Repunante d’Honor por parte una “Alta autoridá”. Darréu, sedrá David Rivas, comu Presidente del Conceyu Repunantes, l’encargáu de glosar al nuevu Repunante d’Honor y face-y entrega del espetu de plata y Diploma d’Honor. Finalmente, tendrá llugar la parte más naguada del actu -aparte de la cena-: el discursu del Repunante d’Honor.
Pa esfrutar del esmeráu menú asturianu previstu pa la cena ye preciso reservar anantes de les doce la nueche del míercoles 19.
Redaición InfoAsturies
This work is licensed under a Creative Commons Attribution 4.0 International License.
