Andecha Astur propón al Gobiernu d’Asturies la cellebración istitucional la declaración Soberana del 25 mayu de 1808 y convoca una concentración el domingu 23 n’Uviéu, baxo’l llema “Soberanía ye futuru” n’alcordanza de la Declaración de Soberanía de la Xunta Xeneral

Esti domingu 23 a les 13 hores ta convocáu un actu políticu a les puertes de la Sala Capitular onde, hai 223 años, tuvo llugar la Declaración de Soberanía pola Xunta Suprema. Nel mesmu, fadráse alcordanza d’esti fechu -la penúltima declaración de Soberanía del Pueblu Asturianu- y revindicaráse’l mesmu drechu a que seyan los asturianos los que decidan el so futuru.

Arriendes d’ello, Andecha Astur vien de proponer ante la Xunta Xeneral l’aprebación d’un conxuntu iniciatives pa reconocer y cellebrar istitucionalmente esta fecha. Dende la formación nacionaliega consideren que los partíos españoles, que tienen mayoría na Xunta Xeneral, nun puen ñegase a reconocer aquella declaración soberana y a incluyila comu fechu cimeru na recostrución de la Memoria Hestórica d’Asturies.

Hai que remembrar que nel 1808, nun tiempu récord que namás pue desplicase si hai una intención soberanista previa, Asturies non solo se declaró soberana, sinón que formó l’Exércitu Defensivu Asturianu, dotándose incluso d’embaxaores d’Asturies qu’unvió al Reinu Xuníu,  anició tribunales propios, istitucionalizó la bandera d’Asturies y collaboró col Pueblu Asturianu na defensa’l país astur y na escoyeta’l so futuru.

“Son toos ellos unos fechos de tala importancia na hestoria de cualisquier pueblu que los protagonice, que los sos sucesores tienen la obligación hestórica, política y ciudadana de reconocelos y remembralos cola dinidá que representen” declaren dende Andecha Astur, polo que reclamen al Gobiernu de Barbón, sofitáu istitucionalmente por IU y Podemos, que cellebren estos fechos comu se merecen.

En concreto, proponen que la Xunta Xeneral declare’l 25 mayu de ca añu comu fecha de necesaria cellebración istitucional por parte Gobiernu d’Asturies y la Xunta Xeneral, convocándose esi día una sesión estraordinaria del so Plenu, na que se llea un testu de remembranza d’aquella declaración soberana d’Asturies, qu’el Plenu de la Xunta Xeneral visite istitucionalmente la Sala Capitular d’Uviéu, onde asocedió la hestórica declaración de soberanía y qu’esa mesma sala permaneza abierta al públicu nesa fecha pa la so conocencia y reconocimientu.

L’aceutación d’esta propuesta por parte l’executivu asturianu supondría un reconocimientu esplícitu d’un intre nel que’l Pueblu Asturianu foi soberanu y dueñu’l so destín, iguando un vacíu, que los nacionaliegos consideren intencionáu, na memoria hestórica d’Asturies.