Demientres l’actu n’alcordanza de la Declaración de Soberanía del 25 Mayu del 1808, los militantes d’Andecha Astur ficieron una ufrienda floral y escribieron “25 M Soberanía” con grandes lletres inflables que lluéu escolingaron delantre la Xunta Xeneral

L’actu tuvo llugar delantre la Sala Capitular na que fore declarada, nel 1808, la soberanía de la Xunta Xeneral d’Asturies, intre hestóricu nel que los asturianos decidieron garrar les riendes del so futuru. Unos fechos d’importancia tala na hestoria de cualisquier pueblu que, en pallabres de Mario Arbesú -quien protagonizó la intervención política- “que los sos sucesores tienen la obligación hestórica, política y ciudadana de reconocelos y remembralos cola dinidá que merecen, tomándolos comu referentes pal so futuru”.

Arbesú aportunó na continuidá qu’esti deseyu de soberanía tien nel Pueblu Asturianu, remembrando la República Obrera y Campesina d’Asturies, en 1934, o la declaración de Soberanía del Conseyu d’Asturies y Llión en 1937 “El caberu gobiernu vraeramente democráticu y republicanu que tuvo Asturies, anantes de la llarga escuridá del franquismu y los 40 años del réximen monárquicu del 78″

Pero sobro too, la intervención de Mariu Arbesú cincó la urxente necesidá n’Asturies d’anguañu de recurrir a la Soberanía pa superar la situación de dependencia que carecemos.

Nesi sen Arbesú recalcó la emportancia de que seyan los asturianos y les asturianes quienes tomen les decisiones qu’afeuten a la so vida diaria, poniendo’n valor les propies istituciones. Nel so discursu dedicó unes pallabres a la problemática específica la mocedá, les muyeres, la xente mayor y los coleutivos minorizaos, recalcando que’l compromisu d’Andecha Astur pa col futuru ye con tolos que viven n’Asturies, seya cual seya’l so orixen y circustancies

“La soberanía d’un país costruyese dende la solidaridá y vamos incorporar ca vegada más coleutivos a esta causa llexitima que ye pidir futuru p’Asturies y saber qu’esi futuru namás podemos costruyilu nos mesmos y mesmes, decidiendo, siendo lo que queremos ser, ensin condicionamientos, en xunidá, ensin plazos y ensin  tener qu’entrugar a naide”.

Tres de la intervención, na que se fexo una ufrienda floral na puerte de la Sala Capitular y tres la interpretación de la Flor del Agua, l’actu continuó a les puertes de la Xunta Xeneral, onde s’escolingaron les lletres “25 M Soberanía”.

Nuria Prendes

This work is licensed under a Creative Commons Attribution 4.0 International License.