Que los organizadores del Congresu de Repunantes lo consideren un ésitu tien especial méritu, nun escaezamos que, por definición, son repunantes y ye dificil tenelos contentos. Sicasí, aconceyar nestos tiempos 25 persones, pente les que se cuntó con muncha xente nuevo qu’aportó a Llaviana dende conceyos de toa Asturies ya incluso dende Euskadi,  ya, por primer vegada cola presencia nel actu d’un diputáu-Adrián Pumares de Foro- foi abondo pa que se declaren arguyosos del resultáu.

Los repunantes entamaron aparecer asigún l’orde del dii espardíu peles redes sociales ya arrecibiendo el Diploma d’asistencia que los acredita como Repunantes Diplomaos. L’actu oficial emprimó a les 21:15, con David Castañón (Repunante d’Honor ya influencer de chigre)  como Mayestru Ceremonies, llanzando regodones llingüísticos ya pidiendo perres “qu’esto nun ye de baldre ya namái qu’apurrimos perres los del Conceyu Repunantes”; de siguío dio-y la entrada al Presidente Supremu, David EME Rivas, pa que ficiere el discursu emponderando los méritos del nuevu Repunante d’Honor.

El Presidente del Conceyu Repunantes nun aforró afalagos, definiendo a Xuan Nel Gonzali con frases comu  ” Ún de los camises vieyes de la repunancia organizada”  y “Ye ún de los factotum del asuntu y puede qu’el principal”, comparándolu col Stalin de los repunantes “Si a min me correspondiera’l papel de proponer una llocura, que güei ye la esta nuesa realidá, y a David Castañón, segundu repunante d’honor, el de propagandista y publicista, fuera Xuan Nel Gonzali l’organizador, l’home que diera los pasos p’afitar la obra. A elli se-y debe la formalidá de los nuesos congresos, la cadarma estatutaria, los diplomes y condecoraciones, la disciplina interna. Si’l primer repunante d’honor cumpliera como Ignacio de Loyola o como Marx, el segundu fixo llabor de Francisco de Javier o de Lenin ya’l terceru el de Francisco de Borja o de Stalin”, finando la so glosa coles pallabres “Arrecibe, Xuan Nel, el títulu y la medaya del to rangu. Pon bon facer ellí onde vaigas, protexe a los débiles de la crueldá de los maltomaos, defende la causa d’Asturies y, por favor, ¡vacúnate y nun faigas el pijo! ” llantándo-y darréu al allabáu l’espetu de plata y faciendo-y entrega del Diploma personalizáu, obra de l’artista Berto Peña.

Entá tendría d’esperar el protagonista de la nueche anantes de dar rienda suelta -pero controlada- a la so repunancia, pues anantes del so discursu recibió otres pallabres de la Repunante Diana Xedré, emponderando tamién el llabor de Xuan Nel Gonzali dientro’l Conceyu Repunantes.

Aportó por fin el tiempu de falar el nuevu Repunante d’Honor, quien citando a Fidel Castro y con unes 200 páxines na man comu menacia de discursu, entamó siguiendo la llinia de les anteriores intervenciones, ello ye, emponderándose y garrando tol méritu de tar  allí “arrecibir esta distinción, nun ye arguyu nin ye satisfación: MERECÍALO; esin más“.  Pasó darréu a facer una rápida esbilla de la so vida, p’aportar darréu a los sos temes favoritos: la pLandemia “Una pLandemia apocalíptica, con un andanciu perintelixente, qu’ataca nos chigres masque respeta nos ALSAS, qu’ataca si mos aconceyamos más de SEIS nun restorán masque respeta si mos atopamos nel ALIMERKA un ciento d’ellos, que mos ataca si vamos trés pela cai esin bozal masque respeta si son 25 xuntos ya revueltos tres d’un balón” ya colos sociollistos, mui especialmente col sociollistu más quíxole del momentu d “Esi ser superior (Súper Barbón) que diz que defiende los intereses d’Asturies ‘por tierra, mar ya aire’; no de la tierra, ta mui clariquino, ya sinón mirái como cuida los ALSA; nel mar, que-y entruguen al “indiu” cuándo foi la cabera vegada que pagó una multa por contaminar; ya pol aire hebía que facer una investigación a ver porqué los billetes d’avión cuesten lo que cuesten a los asturianos ya tienen eses ablucantes conesiones colos aeropuertos del mundiu.”

Seique nun ye un de los sos principales focos d’atención, Xuan Nel nun pudo desaprofitar la presencia del diputáu de Foro, Adrián Pumares, nel congresu retándo al so partíu “No que cinca p’algamar xente pal proyectu de vueso, tais con una oportunidá hestórica ya, de pasu, mandar p’allalantrones los sociollistos (yá apareceremos nós dempués d’ello). ¿Cómo? Cenciellu. Convocáis una rueda prensa diciendo que queréis la OFICIALIDÁ darréu ya que vais presentar moción pa votar nel parllamentu asturianu enantes del branu (lo mesmu nun vos da tiempu, colo de les vacaciones de la santa selmana).”

Xusto a tiempu -depués de los discursos, pero anantes de la llacuada- apaeció n’escena’l caricaturista Ferant, tamién miembru del Conceyu Repunantes , que llegó tarde por torgues familiares y fizo solemne entrega de la tradicional caricatura qu’acompanga la Repunancia d’Honor.

Tres de l’abondosa cena -ye pocu recomendable tener un repunante esfamiáu- na que l’equipu d’El Pintu, con Zori ya Diego a la cabeza, sirvieron xamón de gochu asturcelta, tortos, merluza del pinchu, cabritu guisáu ya arroz con lleche, regao too con sidre mesa 1947, de Viuda d’Angelón, ya vinu de Cangas, La Descarga, procediose a la segunda intervención del Presidente Supremu, David EME Rivas, col so discursu protocolariu que daría remate al actu.

Escoyó, como cuasi siempres, información estremada ya perinteresante del fechos repunantes que faen de la repunancia d’algo yá abondo vieyo nesti país de nueso, col títulu. “Los repunantes na formación de la nación asturiana“, nun discursu dignu de ser lleíu con calma, pa lo que vos apurrimos l’enllaz al mesmu completu.