El “Principado” asume esti añu la propuesta –repitía nos caberos años– fecha por Andecha Astur pa que se dignifique y cellebre comu merez la Declaración de Soberanía Asturiana del 25 de mayu y, por primer vegada dase un calter istitucional a esta fecha, de descomanada emportancia dientro la hestoria d’Asturies
Seique la formación nacionaliega considera un trunfu esti reconocimientu oficial de fecha tan sinificativa, apunta tamién a la tibieza del mesmu, aludiendo al “calter esllabazáu de la cellebración istitucional remembrando estos fechos, nun tonu menor y falsiando la so sinificación hestórico” , polo que siguirá revindicando’l plenu sinificáu del 25 de mayu.
Tovía esti añu Andecha Astur propunxo a la Xunta Xeneral l’aprebación d’un conxuntu iniciatives pa reconocer y cellebrar istitucionalmente que’l 25 mayu de 1808 la Xunta Xeneral exerció una temprana reconocencia política de la soberanía popular de les asturianes y asturianos. Na propuesta presentada pal reconocimientu y honra de la hestoria d’Asturies y d’aquellos díis nos que se reconoció que’l Pueblu Asturianu yera soberanu y dueñu’l so destín incluise una cellebración más amplia y esplícita, incluyendo non solo la declaración del 25 mayu de ca añu comu fecha de necesaria cellebración istitucional por parte Gobiernu d’Asturies y la Xunta Xeneral, remembrando la declaración d’esta comu entidá soberana d’Asturies en 1808, sinon tamién la convocatoria añal d’una sesión estraordinaria del Plenu de la Xunta nel que se llea un testu de remembranza de la declaración soberana d’Asturies, visitándose istitucionalmente la Sala Capitular d’Uviéu, onde asocedió la hestórica declaración de soberanía y permaneciendo esta sala abierta al públicu pa la so conocencia y reconocimientu.
This work is licensed under a Creative Commons Attribution 4.0 International License.
