La Coordinadora Ecoloxista d’Asturies denunció énte la Conseyería de Mediu Rural y Cohesión Territorial el baltu de la biesca de vega qu’había a los pies del banzáu del Furacón n’Uviéu

Los ecoloxistes piden que s’investigue l’autoría d’esta balta nun espaciu protexíu de la Rede Natura 2000 y se sancione nel so casu a los responsables de la mesma. Consideren sospechoso que la balta se produxére xusto nel llugar onde pretende desendolcase un nuevu proyeutu hidrollétricu que tien la so tramitación ambiental ensin tramitar y sobro’l que pesen numberosos allegamientos. Dichu proyeutu pretende esaniciar la rampla que facilita anguañu’l descensu de esguines y anguiles del Banzáu del Furacón al calce del ríu Nalón, dando continuidá biolóxica al ríu y regulando amás el so caudal ecolóxicu.

Dende la Coordinadora Ecoloxista opónense a dichu proyeutu porque, amás de ser llesivu pa la fauna del ríu, ye manifiestamente illegal. Tantu la Llei d’Agües como’l Reglamentu del Dominiu Públicu Hidráulicu afiten esplícitamente que los caudales ecolóxicos nun pueden ser oxetu d’esplotación económica, que ye precisamente lo que se pretende nel proyeutu.

Tien de tenese en cuenta amás que, por cuenta del so altu valor medioambiental, la zona na que se proyeuta desenvolver esta obra forma parte de la Zona Especial de Caltenimientu’l Ríu Nalón, integrada na Rede Natura 2000.

La nueva balta del monte, na que fueron baltaos omeros, sauces y encines, facilitaría la implementación d’esti proyeutu, diendo en sencontrariu al que tendría de llevar una política medioambientalmente responsable nun espaciu como la Zona Especial de Caltenimientu del Ríu Nalón.

Redaición InfoAsturies

This work is licensed under a Creative Commons Attribution 4.0 International License.