Mientres Andecha Astur presenta na Fiscalía Superior d’Asturies una denuncia escontra Adrián Barbón Rodríguez, na so condición de Presidente del Gobiernu asturianu, polos supuestos delitos de prevaricación y cofechu, les sos mocedaes tómenlo a goña y entamen una encuesta

La Nueva España sorteó pente los sos llectores una visita a la sede de la Presidencia del Principado, guiada por Adrián Barbón en persona que, a mou de guía turísticu, ensiñó l’edificiu y entretuvo con cotilleos a los afortunaos ganadores del sortéu.

P’Andecha Astur, resulta llamentable, risible y posiblemente delictivo que’l Presidente se convierta, en función del so puestu, n’oxetu-premiu d’un concursu promocional, alcontrando ñicios de prevaricación nel fechu de que se preste, tanto elli comu el Palaciu de Presidencia -un edificiu públicu d’usu oficial y restrinxíu-  pa intereses publicitarios y llucrativos d’una empresa editorial privá (la del diariu La Nueva España), faciendo de guía sólo y esclusivamente pa los sos lletores.

Pa los nacionaliegos, esti proceder “pervierte la dinidá, les fonciones llegales y la categoría d’autoridá pública que tien el cargu de Presidente del Gobiernu asturianu, convirtiendo esta figura en mercancía comercial y oxetu promocional, sometiéndolu al porgüeyu d’una empresa privá”, polo que convida a Barbón a reflexonar sobre les sos cualidaes polítiques y democrátiques pal cargu qu’ocupa.

Alcuentren tamién que se da un tratu de privilexu, al ponese al sirviciu de namás una de les empreses privaes de comunicación qu’hai n’Asturies,”poniendo a les demás empreses del seutor nuna situación de discriminación y desventaxa”, polo que presentaron a la Fiscalía una denuncia por prevaricación. Piden tamién a la Fiscalía qu’abra dilixencies d’investigación sobro la posible esistencia d’un delitu añadíu de cofechu, ello ye, si’l presidente solicitó o recibió dádives o favores comu contraprestación a los sirvicios comerciales prestaos a la empresa editorial, incluyendo posibles compromisos de tratu informativu preferente haza la so persona y xestión.

Les Mocedaes d’Andecha Astur tomen el casu menos en serio y entamaron una encuesta pa valorar a quien recuerda más Adrián Barbón: a la muñeca Chochona, el Perritu Piloto o la Xata la Rifa. Fasta agora, la opción más votada -con un 52’4%- ye la Xata la Rifa.

Nuria Prendes

This work is licensed under a Creative Commons Attribution 4.0 International License.