Ello ye un ñiciu de la vuelta a la normalidá: l’añu pasáu nun se dexó’l so usu pola situación sanitaria
El Conceyu Gozón autorizó de nuevu l’axudicación d’usu temporal de les cuarenta y seis casetes y los dos almacenes na sablera de Santa Marina de Lluanco, dempués d’un branu en blancu por cuenta de la pandemia. Como novedá, esta convocatoria va estendese mientres dos periodos branizos consecutivos, ente’l 15 de xunu de 2021 y el 30 de setiembre de 2022 pa les casetes, entantu que se caltien el calter añal de los almacenes. El canon per añu rebáxase un 10% al respective de la última convocatoria, pasando de 500 a 450 euros pa tola temporada. Los titulares tendrán de faese cargu del caltenimientu de los equipamientos y, en casu de desperfechos, va podese nun devolver la fianza de 140 euros que s’hai d’abonar xuntu al canon correspondiente al primer periodu.
Amás, acútense seis casetes (del númberu 41 a la 46) pa persones con discapacidá igual o superior al 33%. Les entidaes deportives con sede social y rexistraes nel conceyu, antigüedá mínima de diez años y más de 100 socio/as van poder solicitar l’usu de los almacenes axacentes y van tener la obligación de velar poles condiciones de salobridá de los mesmos. Toles autorizaciones van axudicase por sortéu. Los interesaos en formalizar el procesu disponen d’un plazu de diez díes dende la espublización del anunciu nel tablón d’anuncios del Consistoriu y na páxina web. La fecha y hora del sortéu va faese pública nestos mesmos canales con siquier trés díes d’antelación.
Redaición InfoAsturies
This work is licensed under a Creative Commons Attribution 4.0 International License.
