“Los partíos españoles faen goña d’Asturies, atropellando les iniciatives de la Xunta Xeneral que xeneraron ellos mesmos”

Esti 11 de mayu’l Congresu español refugó una propuesta presentá pola Xunta Xeneral d’Asturies, conocía comu “Proposición de Llei d’Universalización del Drechu a l’Asistencia Sanitaria Pública”. El testu quería garantizar drechos sanitarios universales, incluyendo foriatos ensin papelos, y refugaba’l copagu sanitariu. Votaron escontra PSOE, PP, Vox y Foro Asturies; astuviéronse Podemos y PNV; votaron a favor ERC, EH Bildu, Ciudadanos, PDeCAT y Más País.
Sobro esti fechu entrevistamos a Miguel Ánxelu Agudo, trabayaor de la Sanidá Pública Asturiana y voceru de la Estaya Sanidá d’Andecha Astur.

Independientemente del resultáu les votaciones, ¿son eficaces esta triba d’iniciatives de la Xunta Xeneral en Madrid?

La propuesta, que sólo ocupa tres páxines y media, tien más o menos sentíu nel so conteníu sanitariu. Esiste dende hai 6 años, cuandu la presentó IU na Xunta Xeneral, onde entardaron añu y mediu n’aprebala. Llueu pasaron 3 meses enantes de que rexistrala en Madrid, onde lleva yá más de 4 años. Hebio una disconformidá del Gobiernu español y la Xunta Xeneral tornó presentala nel Congresu en 2019. Tardaron 13 díes en clasificala. Demientres 2 meses llargos tuvo la propuesta a criteriu’l Gobiernu español, que llueu gastó otros 2 meses llargos en retrucala. Llueu tuvieron la propuesta a consideranza’l plenu demientres 14 meses. Y el 11 de mayu d’esti añu, nun momentín, aconcéyense pa insultar a los asturianos y votar escontra la propuesta la Xunta Xeneral. Seyes años pa esto. Ye dicir, los preseos que tienen los parllamentos autonómicos y l’estáu pa iguar les rellaciones ente ellos son dafechamente inútiles: 6 años pa una propuesta que se refuga. Los partíos españoles faen creyer que trabayen y nun faen un res, engañen a la ciudadanía y, en rialidá, nun los representen.

¿Cómu interpretes que la esquierda española vote a favor n’Asturies y en Madrid vote a la escontra la so propia propuesta o s’astenga?

Asina ye. IU propunxo la iniciativa n’Asturies, Podemos y PSOE asumiéronla equí. Pero en Madrid, Podemos astúvose, tamién los miembros d’IU que formen parte d’esti grupu. Y PSOE votó a la escontra nel Congresu. Les asturianes y asturianos tienen de tomar bona nota d’esto y castigar nel so momentu a quien somete la Xunta Xeneral a esti tipu d’homildaciones. Equí faen por ganar votos defendiendo una propuesta bastante asumible y, comu al cabu los 6 años la xente yá nun s’alcuerda de ná, en Madrid encárguense de baltiar la so propia propuesta. Impresentable. ¿Pa qué lleven a Madrid un testu que saben que los sos compañeros van baltiar? Nel so casu nun ye pa evidenciar un conflictu competencial ente Asturies y l’Estáu español. Nel so casu ye pa facer bonismu políticu ensin pagar preciu: faigo que defendo lo guai y llueu quítolo de delantre. Pero, claro, les consecuencies son bien doloroses p’Asturies: los mesmos partíos españoles que defenden equí la propuesta atropellen escandalosamente’n Madrid a la Xunta Xeneral; y el Pueblu Asturianu queda ensin los beneficios sanitarios que representaba la propuesta y cola evidencia de que la Xunta Xeneral ye manifiestamente inútil y cobarde. Si la propuesta la llevare’l parllamentu catalán o el vascu, de xuru que’l comportamientu de los partíos españoles sedría otru. Asturies nun se va facer respetar mentantu nun lo faiga al traviés de partíos propios, mentantu la Xunta Xeneral nun seya la espresión braera de la soberanía asturiana.

Entós ¿nun ves eficacia nesti tipu representación política?

Denguna. Esti modelu de Xunta Xeneral nun mos representa, porque nun tien plena soberanía y porque nun hai dengún control de la ciudadanía sobro l’aición político que desendolquen los sos diputaos. Sólo mos piden la entrega mansa d’un votu ca cuatru años. N’Andecha Astur puxamos por un sistema de representación con control políticu por parte la ciudadanía, por un modelu de participación costante sofitá en conceyos abiertos y consultes ciudadanes. Y, por supuestu, el Congresu español nun ye que nun mos represente, ye que representa tolo contrario: la dominación que fae’l réxime borbónicu español sobro los países que tien sometíos nel Estáu.

¿La política sanitario desendólcase toa con patrones tan llamentables comu éstos o ves con más esperanza otres estayes?

La política sanitario de la FSA-PSOE, la de Barbón, sí, ye toa igual de llamentable. Un exemplu de cómu la Conseyería Salú se comporta comu un ente mafiosu: tán menaciando a les enfermeres que trabayen en turnu de mañanes y les que tiníen xorná reducía pol so drechu a la conciliación familiar; dícen-yos que si nun tornen a turnos y a xorná completa van destinales al retén d’ária, lo cualo sinifica que nunca nun sabrán ú van trabayar al díi siguiente, pudiendo mesmamente desplazales del HUCA al Hospital Monte Naranco nel día y ensin previu avisu cuandu-y pete a l’alministración. Lo mesmo tán endureciendo les condiciones llaborales de los mélicos d’especialidades non quirúrxiques, sometíos de contino a criterios de movilidá forzosa. Otru exemplu son los nueos contratos que se tán firmando n’enfermería fasta avientu, fáenlos en bloques de tres meses pa que’l presonal nun xenere drechu a vacancies. Un casu más, en cuantes la Conseyería confirmó los pieslles parciales de dalgunes plantes hospitalaries nel HUCA, van dexar sólo dos enfermeres nel turnu de díi y una sola pela nuechi, dalgo que pue poner en pelligru fasta la propia vida los pacientes. Y esto va asoceder n’ONCE plantes del HUCA dende xunu a ochobre (que sedrán más meses entá). Con 24 pacientes baxo la responsabilidá d’una sola enfermera; si tenemos dos emerxencies ¿qué quieren que decidamos a quién salvar y a quién dexar morrer?, paezme demencial.

Entós Barbón, perbaxu la campaña escontra’l coronavirus, ¿ta recortando les prestaciones sanitaries?

Esautamente. Barbón pela mañana fae una rueda prensa p’anunciar lo bien que va guiando la so chalanuca oficial escontra’l COVID19 y, esa mesma tardi ordena que’l somarín socialista dispare varios torpeos escontra la Sanidá Pública Asturiana, al reducir entá más les sos prestaciones y la so calidá. Ye cierto que vamos meyor na batalla escontra’l virus, pero ca díi tamos muncho pior en prestaciones y en drechos llaborales na Sanidá Pública. D’eso nun se fala, pero d’eso hai que sacar conclusiones polítiques. Hai culpables. Son pocos, son conocíos y son imperdonables.

¿Hai datos concretos que permitan ver esi ataque a la Sanidá Pública Asturiana?

El PSOE aprofita l’andanciu pa favorecer la sanidá privá, los conciertos sanitarios y el trespasu a xestión privá de nuees prestaciones. Por exemplu, sólo en Xixón, el Gobiernu de Barbón gasta 45 millones € en conciertos con empreses sanitaries privaes. Y, comu referencia, el PP gallegu dedica a ello namái que 5 millones na provincia de Pontevedra, onde ta Vigo, una ciudá entá mayor que Xixón. Otru casu, l’Hospital de Xove (priváu) va pola quinta ampliación (quirófanos, resonancies, cames, consultes…), mentres que l’Hospital de Cabueñes lleva diez años de retrasu nuna anunciá ampliación que ya quedó vieya. Más: les prótesis de traumatoloxía en Xixón, que representen un gastu importantísimu, pónense toes nel Hospital de la Cruz Roxa (priváu). El Sirviciu d’Oftalmoloxía del HUCA opera sólo a 4 pacientes diarios, pero ca díi deriva al Hospital de la Cruz Roxa otros 14 pacientes y la multinacional monárquica y oftalmolóxica de los Vega, n’Uviéu, tien más clientes que nunca que proceden de les llistes d’espera de la pública. Ralentizaron les ciruxíes ortopédiques, con llistes d’espera de más d’un añu pa operaciones importantes y urxentes, y asina consiguieron emburriar a clíniques privaes a un bon númberu pacientes que teníen drechu a una Sanidá Publica rápida y de calidá. De veres, lo que ta faciendo n’Asturies esti socialismu de pacotilla, col sofitu d’IU y Podemos, ye una auténtica sangría, un atentáu imperdonable escontra la calidá de vida y los drechos democráticos del Pueblu Asturianu.

This work is licensed under a Creative Commons Attribution 4.0 International License.