Güei n’Uviéu y mañana en Xixón tendrán llugar movilizaciones de protesta contra la reciente subida de la lluz, apuntando a los dos culpables de la situación con una concentración delantre de la sede de Baser n’Uviéu, señalando a les empreses, y otra delantre la sede de PODEMOS Y PSOE en Xixón, señalando al gobiernu
L’aniciativa d’esta protesta ñació del conceyu abiertu “Xube la lluz, xube la rabia” convocáu pol Bloque Críticu el pasáu domingu, al qu’acudieron tanto representantes d’organizaciones comu persones a títulu individual. D’elli salió la convocatoria d’estes dos movilizaciones contra los abusos d’unes empreses llétriques que “son la meyor representación de lo que ye esti sistema inhumanu nel que vivimos, que xueguen coles nueses vides ensin nengún escrúpulu col únicu oxetivu de sacar beneficios, apoyaes pol Estáu”.
Los convocantes destaquen el fechu de que seya un gobiernu teóricamente d’izquierdes quienes permiten y sofiten esti abusu y precisamente por eso una de les dos concentraciones, la del xueves 10, a les 17:00 hores en Xixón, tendrá llugar delantre les sedes de PODEMOS y del PSOE, col envís d’apuntar direutamente a los responsables de lo que ta ocurriendo. La otra tendrá llugar güei miércoles 9 n’Uviéu, a les cincu la tarde delantre la sede de Baser.
Darréu les concentraciones tendrán llugar conceyos abiertos pa entamar otres movilizaciones.
Llucía F. Marqués
This work is licensed under a Creative Commons Attribution 4.0 International License.
