L’Agrupación de Montaña Torrecerredo propón prestoses y perinteresantes propuestes pa la reciella y mocedá que quiera conocer Asturies en tolos sos aspeutos: xeográficos, climáticos, flora y fauna, xeolóxicos ecoloxicos, historicos, etnográficos ….

Les actividaes entamaes esti añu son dos, los campamentos nel Puertu Braña, pa la reciella d’ente 8 y 13 años, y la Travesía de la Cordillera Cantábrica, de 14 n’alantre. La filosofía d’estes actividaes ye proveer una esperiencia activa y saludable al aire llibre, nun entornu natural, abriendo-yos les puertes a la montaña a la mocedá y reciella, que una bones la descubren, pide más, creando vezos sanos y promoviendo una triba d’arruelu venceyao a la ñatura ya l’esporte.

Los campamentos, orientaos a la reciella d’ente 8 y 13 años, entamen el so primer turnu el 5 de xunetu, pero repetiráse l’actividá dica finales d’agostu, pa que los grupos seyan reducios, acordies a los ratios recomendaos polos protocolos de sanidá, un aspeutu que curien permuncho pa garantizar que nun se den contaxos nel entornu del campamentu. Les actividaes del mesmu incluin rutes de montaña, espeleoloxía, escalada, orientación en montaña, acampada al aire llibre y muncha formación, tanto de cuestiones relacionaes col esporte en si como cola xeoloxía, flora y fauna del alrodiu.

La Travesía de la Cordillera Cantábrica, pensá pa rapacinos un pocu mayores, consiste’n trece díes percorriendo’l cordal en comuña con dalgunos de los más espertos guies de montaña del país, acomuñando arruelu con deprendizaxe y convivencia nuna esperiencia que yos camuda la forma de ver la vida, a unes edaes nes que les ufiertes d’entretenimientu son escases y polo xeneral, allonxaes de la ñatura. La Travesía tien dos turnos, del 5 al 16  y del  19 al 30 de xunetu.

Pa más información ya iscripciones, visitar la web de l’AMA Torrecerredo.

Estes actividaes tienen continuidá coles propuestes que l’A.M.A. Torrecerredo tien pa tol añu y que formen parte de la so Escuela de Montaña: Escalada, Esquí, Senderismu, Montañismu y Naturaleza, con téunicos esportivos titulaos y cumpliendo coles desixencies normatives regulaores tanto nel ámbetu esportivu-pedagóxicu como’l mediuambiental y sanitariu.