La concentración ayeri delantre los llocales de Podemos y PSOE señaló a estos partios como “mercenarios del capital” ya “izquierda domesticada” pol papel que tan xugando nel gobiernu d’España

Alrodiu mediu centenar de persones aconceyaron ayeri tardi al pie de la sede de Podemos pa protestar ante’l partíu nel Gobiernu pola descomanada xubía nos precios de la lluz. Los concentraos pegaron papelos coles sos revindicaciones na puerte de la sede y cortaron la cai coreando llemes contra’l partíu y a favor de la clas obrera, anantes de la llectura del comunicáu nel que s’insistió na falsedá d’estos partios qu’aportaron al poder afitaos nun supuestu sofitu a les clases populares pero qu’a la hora la verdá “arrodíllense ante les empreses llétriques, nun saben xestionar les necesidaes básiques de la población, les desfiucies que diben eliminar non solo siguen, sinón que van a más…”.

La concentración foi brevemente interrumpía por un simpatizante de Podemos que se llanzó a arrancar los papelos de la puerte mientres trataba de torgar que continuare la intervención aduciendo que’l so partíu ye l’únicu que s’enfrenta al gobiernu y pon frenu al facismu, a lo que se-y retrucó que “ellos son los que tan nel gobiernu, entérese. Los que dan ales a VOX son esta xente” tres de lo que la intervención continuó ensin más problema; el tonu de la intervención foi subiendo, fasta acusar direutamente de mercenarios del capital a “el PSOE xunto con esta izquierda domesticada de mierda que nos ta engañando día tres día, pero al final el tiempu pon les coses en so sitiu”.

D’ellí, los concentraos allegaron a la sede’l PSOE, onde se repitieron los llemes y se relleó’l comunicáu. A lo llargo l’actu foron abondes les persones que se foron sumando espontaneamente al sentir el conteníu de les protestes.

Nuria Prendes

This work is licensed under a Creative Commons Attribution 4.0 International License.