Andecha Astur reta a PSOE, IU, Podemos y Foro a que aprofiten esta oportunidá “de prebar con fechos la so cacarexá asturianidá” 

El presidente de la Xunta Xeneral d’Asturies acaba treslladar a los grupos parllamentarios la propuesta d’Andecha Astur pa que la Xunta se cellebre ca añu, de manera dina ya istitucional, la Declaración de Soberanía que’l 25 mayu de 1808 protagonizó esa istitución, al declarar soberanu al pueblu asturianu nun de los intres hestóricos más relevantes de la hestoria del país, que la formación nacionaliega lleva revindicando va décades y que namás agora entama a ser timidamente reconocíu poles istituciones públiques.

P’Andecha Astur foi precisamente la insistencia de la esquierda nacionaliega asturiana en defender esta fecha y caltener vivo la so memoria lo que fizo que nun s’escaeciere, forciando al Gobiernu d’Asturies a reconocela. Esti añu, por primer vegá, el Gobiernu presidíu por Adrián Barbón tuvo una alcordanza pa estos fechos, seique retayando’l so significáu de determín soberanu y reduciendolu a l’aneudota de la creación de la bandera asturiana.

Agora los grupos parllamentarios de la Xunta Xeneral debatirán en plenu la propuesta d’Andecha Astur. Esta inclui que la Xunta Xeneral declare’l 25 mayu de ca añu comu fecha de cellebración istitucional; que ca 25 mayu la Xunta Xeneral convoque una sesión estraordinaria del Plenu, na que se llea un testu de remembranza d’aquella declaración soberana d’Asturies; que ca 25 mayu’l Plenu la Xunta Xeneral visite istitucionalmente la Sala Capitular d’Uviéu, onde asocedió la hestórica declaración de soberanía y que ca 25 mayu la Sala Capitular de la Catedral d’Uviéu permaneza abierta al públicu pa la so conocencia y reconocimientu.

La decisión queda nes manes de los partíos presentes na Xunta Xeneral y Andecha Astur reta a PSOE, IU, Podemos y Foro a que aprofiten esta oportunidá “de prebar con fechos la so cacarexá asturianidá y esclariar cuálu ye de verdá’l so compromisu en materia de recostrución de la Memoria Hestórica d’Asturies”.

Redaición InfoAsturies

This work is licensed under a Creative Commons Attribution 4.0 International License.