La empresa nun ta pagando les cotizaciones a la Seguridá Social  los postreros nueve meses. Amás  débe-yos les nómines dende febreru a los sos trabayadores ensin regular

La azarosa hestoria de la empresa, dende la so fundación como fábrica d’Amortiguadores Bulnes, pasando por ser conocida cómo Monroe y Teneco, agora Vauste, llevóla a pasar de man en man nun llentu procesu de desanifciu que dalgunos de los sos trabayadores lleven décades anunciando. Dempués de pasar poles manes del fondu utre Quantum Capital Partners, especialista en lliquidar empreses, ye agora propiedá de NMR, grupu implicáu tamién nel casu EBHI y la trama carbonífera.

Desque s’empecipió l’esmantelamientu y mientres tou esti tiempu, los sos trabayadores fueron un exemplu de llucha polos sos puestos de trabayu.  Los delegaos sindicales de Vauste CSI, que lleven 4 años prediciendo esti desenllaz, foron acosaos, illegalmente sancionaos, atacaos llaboral, personal y sindicalmente, con denuncies falses que se cayíen nos múltiples xuicios. Una caseta revindicativa lleva dende’l mes de xineru, como denuncia d’esti procesu y midida de protesta pa desixir la reincorporación de los 60 trabayadores que se vieron afeutaos pol Espediente de Regulación d’Empléu (ERE) presentáu pola empresa como xuno de los pasos “pa salir del concursu d’acreedores”.

La última noticia espublizada sobro Vauste da la razón a les más escures predicciones de los sindicalistes de la CSI: amás de llevar  5 meses ensin pagar la nómina a los sos trabayadores ensin regular, la empresa atropa una delda de 800.000 € cola Seguridá Social pol impagu de les cotizaciones de los sos emplegaos dende ochobre del 2020, ello ye, esautamente dende que recibió la confirmación de la so salida del concursu d’acreedores nel que taba somorguiada, un pasu más nel procesu d’esmantelamientu y preslle de Vauste que la dirección de la empresa tien difícil siguir negando.

Llucía F. Marqués

This work is licensed under a Creative Commons Attribution 4.0 International License.