Convócase a la fuelga’l próximu vienres 18 de xunu al personal temporal ya interín de l’Alministración Xeneral del Estáu, Alministraciones Autonómiques, Alministración Llocal, Axencies Públiques, Empreses Públiques, y Entidaes de Drechu Públicu cola fin d’esixir el fin del problema de temporalidá nes relaciones llaborales y alministratives nes Alministraciones Públiques
Ente les sos revindicaciones destaca’l cambéu del Estatutu Básicu del Emplegáu Públicu p’afitar sanciones disuasories a les Alministraciones que, como ye’l casu de l’asturiana y más específicamente, nel casu de la docencia, abusen d’esti tipu de contratos. SUATEA, como una de les organizaciones convocantes, recuerda que la protección de los drechos llaborales del personal víctima d’estes práctiques ta recoyida na Directiva Europea 1999/70 / CE y del Tribunal de Xusticia de la Unión Europea (TJUE), lo qu’esixe l’afitamientu de los puestos ocupaos por esti personal.
Pa evitar qu’esti problema se perpetúe, piden cambeos llegales y normatives que permiten l’afitamientu del empléu del personal qu’anguañu s’atopa en situación d’abusu de la temporalidá. “La solución pa les persones en situación d’abusu nun pue resolvese con convocatories d’oposiciones masives per parte de les distintes alministraciones, que namái pretenden estabilizar les places y non a les persones” puntualicen dende’l sindicatu asturianu d’ensiñantes.
Per otra parte, consideren una amenaza contra’l personal temporal ya interín la propuesta de cambéu del artículu 10 del EBEP del Ministru Iceta, yá que non yá nun soluciona’l problema sinón que lu agrava, sancionando a los trabayadores n’abusu de temporalidá col despidu forzosu y ensin indemnización, cargando les consecuencies de la mala praxis sobro les víctimes de la mesma ensin apurrir soluciones a la temporalidá y penalizando a les y los usuarios de los servicios públicos en llugar d’a les Alministraciones incumplidores.
Desixen finalmente, según les circunstancies concretes de cada sector o alministración, la suspensión de les OPEs de estabilización, la esclusión de les places ocupaes por personal n’abusu o l’establecimientu d’una garantía de permanencia del personal que resulte afectáu pola so execución.
Poro, la Confederación Intersindical y los STEs-i, nos que ta integrada SUATEA en representación de los docentes asturianos, xunto con otres OOSS y a la Coordinadora Estatal de Personal Públicu Temporal faen un llamamientu al personal temporal ya interín de toles Alministraciones Públiques a secundar la fuelga del próximu 18 de xunu.
Redaición InfoAsturies
This work is licensed under a Creative Commons Attribution 4.0 International License.
