El piloñés aniciará aiciones llegales contra’l conceyal del PP que lu insultó en redes llanzando falses acusaciones sobro’l comportamientu d’esti col so difuntu pa

Cualquiera que tenga tratu con Maxi Areñes sabe del fondu sentir qu’esti tien pa col so pa, home al que respeta y almira, comu per otru llau tresciende de les espublizaciones que fae d’avezu nes redes sociales. Poro, a naide pasó desapercibíu’l comentariu fechu sobro una semeya del pa de Maxi, na que’l músicu escribía “Mio padre, n’Areñes (Piloña) nel añu 1994, con dalgunes de les gaites a rabil que fizo”, en Facebook. Germán Noriega Rodríguez Gullén arrepostiaba a esta espublización eloxando al paisano, al tiempu qu’acusaba’l fiu de nun lu atender, insistiendo en nun se retractar y aporfiando nes acusaciones por más que se-y pidiere y se-y indicare que de xuro taba tracamundiando casos.

Dexando al marxe que fuere o non verdá esta acusación, tolos que vieron la noticia coinciden na gravedá d’una acusación d’esi talante, fecha en públicu y por parte d’un representante políticu, puesto que Rodríguez Gullén ye conceyal de Piloña pol PP. Son munchos los que ven, precisamente, un componente políticu nes acusaciones del conceyal, ya que ye sobradamente conocíu’l llabor que Maxi Areñes fae -musical, lliteraria y políticamente- pola cultura y la identidá asturianes, daqué qu’ensin dubia escuez al españolismu del Sr. Noriega.

En cualisquier casu, Maxi agradez a los sos contautos el sofitu recibíu y pidi que nun se retruque más a esti señor, ya que tan aniciaes les correspondientes aiciones llegales.

This work is licensed under a Creative Commons Attribution 4.0 International License.