Concentración esta tardi, 29 de xunu, pa que s’eliminen los nomes de les 21 cais d’Uviéu qu’entá caltienen simboloxía y/o nome franquistes

Les 24 organizaciones convocantes consideren que más de 40 años depués de rematada la Dictadura de Franco, son munchos de los elementos ideolóxicos y culturales que permanecen nes nuestres istituciones y nel aparatu l’Estáu, amás de na nuestra sociedá. Los resclavos de la dictadura caltiénense vivos na política actual, tres de la fallida y mal nomada transición, dexando en plena forma ñicios que despliquen les resistencies nel Poder Xudicial ya istituciones públiques a, pente otres coses, desplicar y/o eliminar los símbolos que reconocen y emponderen el franquismu nes cais y places asturianes. N’Uviéu son 21 les cais onde se sigue honrando la memoria de la dictadura española con nomes qu’en munchos casos emponderen a personaxes que foron crueles y sanguinos enemigos del pueblu asturianu, daqué que solo s’entiende pola continuidá del rexime -con formes de represión más sele- nel sistema actual.

Güei, a les 19:00 tendrá llugar una concentración na Plaza del Fresno, n’Uviéu, que desixirá la retirada darréu de les señes franquistes de les cais d’Uviéu. De la mesma manera, los convocantes comprométense a “tar sollertes a los cambeos nos nomes de les cais y a siguir calteniendo esti espaciu de confluencia, ampliándolu a otros coleutivos y persones pa reforzar una convivencia sana nuna sociedá democrática dafechu”.

Nuria Prendes

This work is licensed under a Creative Commons Attribution 4.0 International License.