La Conseyería de Mediu Rural y Cohesión Territorial publicó apocayá’l resolvimientu que permite l’arranque d’algues pa 4.600 tonelaes esti añu, dende Cuideiru hasta la llende con Cantabria, ensin realizar el trámite de consultes previes que ye preceptivu y obligatoriu

La recoyida de les algues que lleguen a les sableres ye un métodu perfechamente caltenible de recuperación d’un pervalible recursu biolóxicu, siempres que se llinde a recoyer lo que la mar saca. Dexar, como se fai dende’l 2017, que s’arranque de los fondos marinos pon en riesgu’l futuru d’un recursu biolóxicu marín llindáu, qu’actúa amás como abellugu de los pexes más piquenos.
Los pañadores manuales vense tamién afeutaos pol usu de barcos y tractores que, amás d’acabar cola produción y poner en riesgu la futura, costitúin un peligru diretu pa la so integridá física, al desixise a los tractores caltener una distancia de namás 2’5 metros coles persones, perxudicando una actividá tradicional con escasu impautu y altu nivel d’emplegu en beneficiu d’otra bultablemente nociva y qu’apenes xenera trabayu, faciendo cayer coles mesmes los precios, en perxuiciu de los pañadores manuales.
El “Principado” acaba d’autorizar a 28 embarcaciones a arrincar ocle dende’l 1 de xunetu al 30 de setiembre, desoyendo nuevamente los pidimientos de caltenibilidá que-y vienen faciendo dende va años dende la Coordinadora Ecoloxista.

Estos acusen amás al gobiernu de permitir la estracción d’ocle de fondu del xéneru Gelidium ensin realizar la pertinente Evaluación de Repercusiones sobro los espacios incluyíos en Rede Natura 2000, tal como obliga la normativa europea, polo que volverán treslladar la so quexa a la Comisión Europea.

Les praderíes d’ocle son fundamentales como hábitats marinos, zona d’asentamientu llarval y abelugu contra la depredación pa diversos invertebraos, d’ende la so importancia nel xorrecimientu y desenvolvimientu de los pexes na so primer etapa. Na nuesa plataforma costera hai un significativu amenorgamientu de la biomasa forestal marina pol efeutu’l cambéu climáticu, que se xunta col arranque de l’ocle.

Tampoco nun se tuvo’n cuenta l’impatu de la desapaición de les praderíes d’ocle sobro la dinámica costera y la estabilización de perfiles de sablera, yá que faen d’espigón submarín natural, estenando la fuerza de les marees y amenorgando asina la so potencia erosiva sobro la mariña.

Redaición InfoAsturies

This work is licensed under a Creative Commons Attribution 4.0 International License.