Depués de décades soportando índices de contaminación ambiental incaltenibles, los ciudadanos teníen les  esperances puestes nel tan anunciáu Protocolu de la Contaminación, presentáu va pocu pol Conceyu Xixón y qu’entra agora en fase de presentación d’allegaciones

Pa entamar, nes sos valoraciones del nivel de contaminación, el protocolu namás tendra en cuenta dos de les 17 estaciones de control de la contaminación, la de la Calzada y la del Lloredal, que de fechu entá nun ta istalada nin tien fecha d’istalación. Amás, nun tien en cuenta un de los contaminantes más avezaos y peligrosos que s’alcuentren nel aire xixonés el bencenu procedente de les bateríes d’Arcelor.

Los picos de contaminación atmosférica, responsables de que se disparen los ingresos hospitalarios por enfermedaes respiratories, nun se tienen en cuenta nesti protocolu.

Aparte de lo irregular ya incompleto de les mediciones, les midíes a tomar en casu de dase valores altos de contaminación recaen sobre los vecinos afeutaos, en llugar d’atacar el focu del problema -la contaminación industrial procedente de les cercanes industries-. El protocolu propuestu, con restriciones a la circulación, ta perlloñe de salvaguardar a la población y de aidar a reducir el grave problema de contaminación que carecen. Un de los sos mayores fallos ye’l fechu de que les sos actuaciones tengan calter informativu, avisando a posteriori de los datos de contaminación carecío, en llugar de preventives, orientaes a reducir la esposición a les tosines.

Redaición InfoAsturies

This work is licensed under a Creative Commons Attribution 4.0 International License.