“Pa cuando y toque dir a la primera consulta ya lleva 2 años con les gafes puestes. El que tenga perres, quiera y pueda tirará de clíniques privaes, seguros médicos… y el que no pues ya sabe lo que-y toca” declara la so ma
La cita foi pidía dende’l sirviciu de pediatría onde atendieron al neñu por problemes de visión n’ochobre del añu 2019. La fecha prevista pa l’atención del rapacín foi pa esti mes, xunetu del 2021. Ante’l descomanáu retrasu, la familia decidió llevalu a un oftalmólogu priváu, onde’l mesmu díe se-y graduó la vista, mercando darréu les gafes que dende entós, va más d’añu y mediu, utiliza a diario.
Comu si fore pocu esperar, recientemente recibieron en so casa una carta del Hospital Cientral Universitariu d’Asturies (HUCA) onde se-yos informaba d’un nuevu retrasu na cita, con nueva fecha de 20 d’avientu, ello ye, dos años y dos meses depués de solicitada y dos años depués de que’l paciente estrenare gafes.
Esti casu ye a cencielles un exemplu más de comu la ineficiencia de la Sanidá Pública emburria a los asturianos y asturianes a buscar soluciones en cientros privaos.
Nuria Prendes
This work is licensed under a Creative Commons Attribution 4.0 International License.
