Pesi a qu’esta cuarta fola iguala ya la másima incidencia de les anteriores, los hospitales siguen con plantes presllaes y nun se contrata personal mélicu y ausiliar abondo pa cubrir la demanda sanitaria

La media n’Asturies ye de 654 casos por 100.000 habitantes  y 53 de los 78 conceyos tan en riesgu mui altu, con una tasa de positividá de cuasi el 14%. Llaviana, Degaña y Carreño superen llargamente esa media, siguios de cerca por Ribeseya, Llanera y Villaviciosa. En total son 53 los conceyos en nivel 4 d’alerta.

Tres de les vacunaciones ye la mocedá la principal víctima de les nueves variantes del covid, lo qu’afortunadamente fae que les cifres de muertes seyan mui inferiores a les d’anteriores foles.

La primera fola pillómos despreveníos. Na segunda faltábanos información sobro la enfermedá. Na tercera andábemos entá daqué perdios. Na cuarta, la principal desemeyanza pente la ya deficiente atención sanitaria de la previa normalidá y la actual ye’l fechu de que los mélicos d’atención primaria siguen atendiendo por teléfono, cola consiguiente cayía de la calidá asistencial. Nun hai más personal sanitariu. Nun s’eliminó l’avezáu parón y preslle braniegos. Nun hai más medios. Nun se meyoraron les condiciones llaborales d’un personal sanitariu esgotáu, abusáu y fartu. Los cientros de salú nun dan a bastu y la privada ponse les botes, con un aumentu del 25% na contratación de seguros mélicos privaos n’Asturies.