L’anulación del Festival Aéreu de Xixón por segundu añu consecutivu dexa un tastu agridolce nos sos detractores, dolce porque nun se cellebra, amarguxu porque nun foi la presión social, sinon el virus quien lu baltó
El Conceyu Xixón vien d’anunciar que’l Festival Aéreu tampocu se cellebrará esti añu. Añu tres añu el Festival Aéreu aconceya bon númberu de voluntades a la so contra. A los activistes en favor d’una cultura de la paz y de la desmilitarización d’Asturies xúnense los que, amás, consideren una ofensa hestórica el vuelu sobre Xixón del mesmu exércitu español que masacró a la so población, los que lo consideren una xabazada en términos ecolóxicos, económicos y educativos y aquellos a los que yos abulta una inxerencia menaciante y colonialista por parte l’estáu español. Los sos detractores denuncien una perversa relación pente la Casa Conceyu, empreses privaes ya’l Ministeru de Defensa.
Sicasí, ye’l miéu a los contaxos y non la presión popular la que frenó estos años la cellebración del Festival Aéreu de Xixón. Poro, son munches les asociaciones que deciden amosar el so desacuerdu col Festival, cellébrese o non esti añu, desixendo que se faiga oficial la so supresión dafechu.
Aprofitando la dificil situación sanitaria que se ta viviendo, remembren que namás col presupuestu dedicáu a los aviones Eurofighter EF-2000 que sobrevolaron Xixón n’años anteriores podríen caltenese 25 hospitales y 27.720 cames d’hospital durante un añu.
Llucía F. Marqués
This work is licensed under a Creative Commons Attribution 4.0 International License.
