Esta selmana tuvo llugar una reunión pente la Direición d’Enfermería ya’l personal de críticos del HUCA. Los trabayaores sanitarios acudieron a ella cola esperanza de llegar a entendimientu y alcontrar una desplicación a l’actual situación y posibles soluciones a la precaria situación llaboral esistente nel seutor yá dende anantia l’andanciu
Sigún los participantes nesi conceyu, la falta d’ empatía hacia los profesionales tanto de parte de la direición comu de los mandos intermedios foi patente.
Comentarios comu que “Los héroes nin necesiten descansos nin tienen vacaciones” o la invitación direuta a nun se quexar y aguantar, pente otros comentarios na mesma llínia foron lo más paecio a una “solución” qu’ufrió´l direutor d’enfermería, quien culpo de tola situación a “la pandemia” y nun escaeció prohibir que se grabare la reunión o se ficiere público lo falao na mesma.
Remembremos qu’esi personaxe fo’l mesmu que menació con mobbing a les enfermeres con xornada reducida por conciliación familiar si nun volvíen a la xornada completa. Enfasturiasunida denunciaba yá a entamos del branu el recorte de personal pa sustituir les vacaciones d’Atención Primaria del área IV por que, al paecer, hai problemes serios pa cubrir les vacaciones d’Atención Hospitalaria.
Nel HUCA, préslláronse cames de planta, y en servicios especiales, como Quirófanu y UCI, búsquense desesperadamente enfermeres a les que se-yos dé una formación “exprés” pa cubrir las necesidaes de dichos servicios.
Namás unos díes anantes del entamu del periodu vacacional (tres de presentar tol personal la documentación de les vacaciones a fecha 15 d’abril) Recursos Humanos ta llamando a enfermeres pa moveles d’un serviciu a otru ensin seguir criteriu dalu.
RRHH ta sacando personal del área de críticos, y non poca, cuando hai namás un mes decíen que nun podríen cubrir les vacaciones.
“A naide paez importa-y esta nefasta xestión, esti maltratu a les trabayaores y la repercusión que too esto tien na atención a los pacientes” reclamaben les enfermeres..
Énte la llamentable situación llaboral que carecen, les enfermeres tan, por agora, negándose a doblar turnos.
This work is licensed under a Creative Commons Attribution 4.0 International License.
