Pingarates d’hestoria antitaurina n’Asturies de la man del  Blog “Nes llendes qu’abelluga’l caín”

“Si hebio un país a la vanguardia del movimientu antitaurin fora Asturies porque, a los cuatru argumentos esgrimíos por tolos autores citaos ya otros, añade’l fechu de que la tradición taurina ye inesistente na cultura asturiana”

Españara la polémica pola cellebración prevista en Cangues d’Onís pal día 22 d’una novillada. Con gran entusiasmu por parte’l gobiernu municipal, destacando la opinión del alcalde, José Manuel González Castro, del Partido Popular, cuando diz que “sofitaremos tolo que seya llegal pa promocionar el conceyu”. Nun sé mui bien cuála ye la idega que tien esti alcalde de lo que ye promocionar pero, dende lluéu, na principal de les acepciones del términu nun entra facer dalgo contrario a la cultura propia y menos cuando dirixes un conceyu que reclámase d’escelencia turística. Hai qu’añadir que ye mayoritaria la mala opinión sobre la tauromaquia de la mayoría de los españoles, mayoría tamién ente los turistes que vienen a Asturies, y nun falemos de lo que piensen d’ello alemanes, olandeses o ingleses, que dalguno andará estos díes pela fastera Los Picos d’Europa. El casu ye qu’el conceyal de ganadería fue a Madrid a pesllar l’asuntu cola Fundación Toro de Lidia, que trata d’implantar nel norte peninsular una tradición inesistente sacantes nel País Vascu, de fonda tradición taurina. El casu ye que tres matarifes mui machotes, marcando paquete y con xeitos chulescos, torturarán en público a seyes reses de dos o tres años. Por cierto, tamién sedría interesante saber cuála ye la política ganadera del PP en Cangues d’Onís pa que mande al conceyal del asuntu a negociar a Madrid y a consiguir un llugar priváu pa cellebrar la barbaridá.

El gobiernu d’Asturies, que ye’l que tien que dar los permisos y caltener l’orde y la seguridá durante la cellebración, diz tar en contra de la mesma pero que nun tien competencies na materia, como reconociera la conseyera de presidencia, Rita Camblor. Otra vuelta, como quedara amosao cola pandemia que carecemos, vemos cómo tamos manteniendo a instituciones de gobiernu y a individuos que nun valen nin pa decidir sobre espectáculos públicos, amosando la so manifiesta inutilidá.

Vien a coincidir la novillada canguesa cola vuelta de les corríes de toros a Xixón, tres un añu ensín cellebrase por causa la pandemia. Tamién equí hai munícipes y aficionaos que defenden l’espectáculu porque aporten renta y favorecen el turismu. La realidá ye que lo que saca l’alministración municipal nun da, como aquél que diz, nin pa pagar a dos policíes apostaos na puerte la plaza d’El Bibio. Y, d’otru lláu, los toros nun son activos pa promocionar turísticamente Xixón, teniendo en cuenta que nin tansiquier Barcelona sufrió merma denguna tres la prohibición decretada hai unos años. Y polo que respeuta a aficionaos de fuera que compensen el desinterés de los naturales difícile ye defendelo: tres espectáculos nuna plaza de segunda categoría nun llama a naide, teniendo les grandes feries de Madrid o de Sevilla a la mesma distancia.

Ya ye que nun ye tampoco una razón económica, la falta de sofitu públicu, la que, como dicen los taurinos, pon en pelligru la fiesta. La decadencia de les corríes, desapaeciendo seyes de cada diez na última década, vien motivada pol desenganche de la xente, especialmente pola vergüenza que-ys da a les nueves xeneraciones, como señalen les encuestes. La última d’elles fecha pol gobiernu central ya espublizada en 2015 siñala qu’el 90,5 por cientu de de la ciudadanía nunca va a los toros, con un 56,4 completamente contrariu y sólo un 24,7 a favor. Comparemos: hai un 25 por cientu qu’aceuta l’espectáculu pero sólo acude a ello un 9. N’España va más xente a la ópera qu’a los toros, por falar d’un espectáculu non mayoritariu precisamente, por nun falar de conciertos de rock o folk, teatru o cine. N’Asturies, los asistentes a los campionatos de bolos llenaríen unes cuatru places de toros de Xixón ya unes ocho los que van al descensu’l Seya. Y nun falemos d’otros deportes y, en particular, de fúbol.

Los defensores de la tauromaquia tamién afirmen qu’el movimientu contra esti espectáculu ye una moda pasaxera propia de grupos más o menos antisistema como los ecoloxistes, los animalistes y la nuea esquierda, mui estremista ella. Dalgunos, yá con otru tonu, falen de que tres d’esi movimientu hai una especie de bisarma antiespañola allimentada por partíos separatistes. Porembargu, esiste un pensamientu ya unos posicionamientos antitaurinos dende’l sieclu XIII, muncho enantes de qu’esistieran Amigos de la Tierra, Esquerra Republicana, Podemos o Andecha Astur. Llarga ye la nómina de rellevantes xuristes, pintores, militares, filósofos, clérigos, políticos, historiadores y periodistes que mos dexó una granible heredá. Dende’l sieclu XV vien argumentándose lo mesmo contra la tauromaquia: la crueldá pa colos animales, el gastu de dineru público, la mala imax escontra l’esterior y l’embrutecimientu social que provoca y significa.

Ehí tenemos los escritos de notables como Gabriel Alonso de Herrera, Luis de Escobar, Francisco de Amaya, Pedro de Guzmán, Hernando de Talavera o el mesmu Quevedo, pa continuar con Goya, José Clavijo, Unamuno, Miguel Hernández, Eugenio Noel, José Vargas Ponce, José María Banco White, Emilia Pardo Bazán, Azorín, Wenceslao Fernández Flórez, Rodríguez de la Fuente, Jesús Mosterín… Pero, históricamente, dende los sectores tauromáquicos fraguáronse toa triba de amagüestos col fin de minimizar, silenciar, ridiculizar y desprestixar al antitaurinismu, ya fuera cola maledicencia y l’infundiu como fixeron con Quevedo o cola apropiación de la so memoria, que fora lo que pasó con Goya y Miguel Hernández.

Si hebio un país a la vanguardia del movimientu antitaurin fora Asturies porque, a los cuatru argumentos esgrimíos por tolos autores citaos ya otros, añade’l fechu de que la tradición taurina ye inesistente na cultura asturiana, una cultura na que nun alcontramos espectáculos basaos nel maltratu y la tortura d’animales. Asina atopamos al dramaturgu Francisco Bances Candamo, autor de L’esclavu en grillos d’oru, y tamién un escelente poeta con gran habilidá pa la ironía, qu’emplegó pa dures crítiques a los espectáculos taurinos. ¿Y qué nun dicir de Benito Jerónimo Feijoo, la figura más destacada de la primer illustración? El que fuera vicerrector de la Universidá d’Uviéu y autor d’obres emblemátiques como Teatru críticu universal y Cartes erudites y curioses, fuera tamién un detractor implacable de la tauromaquia. Lo mesmo podemos dicir de Clarín, autor de La rexenta, que, siendo conceyal votó a favor de derribar la plaza toros, actu que calificó de “demostración de la cultura y civilidá d’esta ciudá d’Uviéu”. Tamién foran auntitaurinos convencíos Palacio Valdés, l’escritor realista de L’aldega perdía y presidente del Ateneo de Madrid; y Darío de Regoyos, qu’amosó severes crítiques al sangrientu espectáculu tanto nos sos llienzos como nos sos escrtitos, como nel so España negra de 1899. Lo mesmo podemos dicir de Teodoro Cuesta, quien, tres ser convidáu a una corría toros, escribiera un poema describiendo l’espectáculu y, escandalizáu, terminaba con “tal pruyiciu tinía d’allexame/d’un sitiu onde ensín sangre/nun hai fiesta”. Pela so banda, el críticu de lliteratura y arte José Francés refierse al espectáculu como una lepra taurina que causa emprobecimientu espiritual y cultural. De la mesma forma, mester ye recordar a la periodista y escritora María Luisa Castellanos, una pionera del feminismu, la sufraxista de Llanes, muerta nel esiliu en 1974. Una de les primeres alumnes de la Universidá d’Uviéu, de la so facultá de drechu, fundaora de la revista Alma Astur y autora de Doña Gaudiosa, un rellatu sobro la esposa’l rei Pelayo nel que revindica a les muyeres de los montes de la so patria, Castellanos militó nun fonderu antitaurinismu.

Pero l’asturianu más destacáu del movimientu antitaurín de tolos tiempos fora’l illustráu y lliberal Xovellanos, el sobrosaliente polígrafu xixoniegu. Nel so día escribiera: “Y el pueblo, almas feroces, se atropella/al funesto espectáculo, en que, ¡oh siglo!,/el hombre se degrada hasta el extremo/de ser juguete y presa de los brutos./Clama, clama por fieras y desdeña/a sus Sénecas, Plautos y Terencios./Así, mísera Iberia, así retratas/a Roma en su barbarie, así desmientes/el siglo de las luces, y eternizas/el padrón horroroso de tu infamia”. Na so Memoria pal arreglu de la policía de los espectáculos y diversiones públiques afirma que la tauromaquia nun ye un espectáculu popular na mayor parte d’España, sinón propia de burgos “serviles ya ensín cultura”, al tiempu qu’en países como Asturies ye dalgo estraño y repudiao. Diz: “¿Hai dalguna fiesta que tea la más pequeña rellación o la más remota influencia, entiéndase que provechosa, na educación pública? Ciertamente que nun se citará como tala la llucha de toros”.

Siendo conseyeru personal de Carlos IV, Xovellanos consiguiera la prohibición de les corríes. “Sostener que na proscripición d’estes fiestes, que por otra parte puede producir grandes bienes políticos, hai riesgu de que la nación sufra dalguna perda real, nin nel orde moral nin nel civil, ye ciertamente una ilusión, un deliriu de la preocupación. Ye, polo tanto, claro qu’el gobiernu prohibiera xustamente esti espectáculu y que cuando acabe de perfeccionar tan saludable designiu, aboliendo las esceiciones qu’entá tan toleraes, sedrá mui acreedor a la estima y a los eloxos de los bonos y sensatos patricios”. Xovellanos llevó al rei a firmar la prohibición, como yá muncho enantes Hernando de Talavera, confesor ya home de confianza de Sabel la Católica, convenciérala de perseguir la práctica en Castiella, aprovechando que la reina yera dende mui moza contraria a la mesma, como lo yeran so madre, Sabel d’Avis, y la so güela paterna, Catalina de Lancaster.

Ya ye d’esperar que les manifestaciones contraries a la novillada de Cangues d’Onís sigan produciéndose, como la mui concurría del día 9, acompangada por tres mil firmes contra la so cellebración. Les pancartes y los mensaxes yeran claros: “Cangues, novillada ¡non!”, “Esta nun ye la nuesa tradición”, “Por una imax digna del conceyu”… y ata “La Santina ye antitaurina”. Lo mesmo va pasar en Xixón, como tolos años, anque les restricciones por causa la pandemia obligarán a cambios nes formes.

Estes manifestaciones tampoco son una moda pasaxera nin un inventu’l presente. Amás del llabor de toles figures nomaes anteriormente, l’antitaurinismu fora un movimientu social y políticu mui importante n’Asturies de finales del XIX y ata la última guerra civil. La oposición organizada a los festexos con toros fuera mui amplia ente les clases populares y nos seutores más illustraos del movimientu obreru, siendo, ensín duldia dala, la más importante d’España y convirtiendo a Xixón na ciudá más antitaurina xunto con Barcelona, seguramente pola gran presencia de lliberales, francmasones y anarquistes. En xeneral, fora la sociedá asturiana la punta llanza del movimientu antitaurín.

Ye de destacar la multitudinaria manifestación del 15 d’agostu de 1914, día grande de les fiestes de Begoña, delantre de la plaza d’El Bibio. Asigún la prensa, asistieron más de cuatro mil persones (Xixón tinía unos 55.000 habitantes), ocupando la cabecera, ente otros, el rector de la Universidá d’Uviéu, Aniceto Sela. La marcha tuviera organizada por la Sociedá Antiflamenquista Cultural de Xixón y sofitada por munches otres entidaes, destacando pol so pesu na villa l’Asociación Popular de Cultura ya Hixene, l’Atenéu Obreru ya’l Grupu de Divulgación Llibertaria. Amás de les intervenciones, hebo merienda popular, suelta de páxaros, plantación d’árboles y bailles y cancios populares ya infantiles. Diéronse, diz la prensa, glayíos con mensaxes como “Los obreros contra’l flamenquismu”, “Non a los toros n’Asturies”, “Nun son mayestros, son asesinos”… Mentantu, na plaza, el vascu Torquito, el madrileñu García Malla ya’l peruanu-andaluz Limeño mataben seyes toros nun espectáculu que cuntara tamién cola muerte de varios caballos de picadores.

La Sociedá Antiflamenquista Cultural, presidía por Narciso Costales, tuviera como inspirador al escritor Eugenio Noel, y fuera creada un añu enantes tres una conferencia suya nel Centru Instructivu Republicanu. En namás qu’un añu, la entidá medró considerablemente, lo que vien a sopelexar el fondu antiflamenquismu y antitorerismu de la villa, onde los republicanos ya’l movimientu obreru consideraben l’espectáculu dalgo esótico na so tierra y ayenante pal pueblu y les clases populares, por cuanto yera una forma evidente d’aculturación ya embrutecimientu. Los antiflamenquistes espublizaben la revista El Rayo, na que cargaben contra la tauromaquia, pero tamién contra’l deporte de tiru de pichón, del que fuera campión olímpicu Pedro Pidal, marqués de Villaviciosa, y contra’l maltratu a les caballeríes nes cais de Xixón por parte de los carreteros.

Juan Ignacio Codina, nel so llibru de 2018 Pan y toros. Breve historia del pensamientu antitaurín español, resume de la so tesis doctoral lleyía na Universidá de les Islles Baleares, recueye el perricu pasáu d’Asturies nesta griesca, siñalando qu’anguaño ta sucumbiendo “delantre la importante promoción de les corríes de toros impulsada dende les instituciones polítiques, sobro tóo nos últimos decenios, y la mayor parte de les vegaes gastando pa ello abondoses cantidaes de dineru público”. Si adicamos pa estos años pasaos podemos comprebar la razón qu’asiste a Codina. Los festexos taurinos taben amoriando yá a mediaos de los setenta pero tuvieran un enorme sofitu pa la so recuperación colos gobiernos socialistes de Felipe González, destacando na so promoción l’entós poderosu vicepresidente Alfonso Guerra.

N’Asturies asocediera esautamente lo mesmo, con epicentru en Xixón, aprovechando que les fiestes son n’agostu, con más de mediu miyón de persones na villa na selmana’l 15. Foran tamién los socialistes Álvarez Areces y Fernández Felgueroso, fieles al palcu taurín, los que potenciaron y subvencionaron un espectáculu que nunca, pesie a les condiciones favorables, pasa d’amediar la plaza. Cuando’l poder municipal recayera na drecha, con Moriyón na Plaza Mayor, la cosa continuara, con una alcaldesa tamién asidua a la orxía de sangre. Evidencia esti fechu la superposición de dos estructures socioculturales. una minoritaria taurina, pero dominante políticamente, ya otra mayoritaria y antitaurina, pero subalterna (nunca meyor dicho) políticamente. ¿Cómo si non ye posible que, de cuatru alcaldes d’una ciudá ensín afición a la barbarie, tres sí tean esos gustos? Dicía’l sabiu Salomón, nel segundu llibru de los reis, que “cuando se mezcla ignorancia y soberbia obtenemos una bona dosis de mediocridá”.