La denuncia vien del proxenitor d’un menor que cursa los sos estudios nel IES Padre Feijoo, pero hai constancia d’afeutaos en siquier otros trés centros, incluyendo l’Emilio Alarcos, tamién de Xixón

El 20 de payares de 2019 los pas y mas de los alumnos de 3º y 4º de la ESO del citáu istitutu recibieron información nel centru sobro la posibilidá de que realizaren una “School Visit”, actividá estraescolar entamada pola empresa SYG Educación, sita na Cai Uría d’Uviéu. Na xunta entamada con esi envís, Camino Villa, emplegada de la empresa, vendió a los pas una actividá consistente nun viaxe y estancia nel Reinu Xuníu, programada pa realizase ente’l 20 y el 28 de xunu del añu 2020, na modalidá denomada “inmersión llingüística” y qu’implicaba un desembolsu total de 690€.

Pa ello, el 5 d’Avientu de 2019, decenes de families del IES Feijoo alantraron la cantidá de 250€, abonu que pueden acreditar. Sicasí esi viaxe y estancia en Reinu Xuníu tuvo de ser suspendíu por razones de fuerza mayor, derivaes de les restriciones de desplazamientos de viaxeros, motivaes pola pandemia del COVID-19.

El 23 de Xunu de 2020 los pas aceutaron la opción de la empresa S y G, trocando la reserva por un bonu de dolce meses de duración, previendo que la enfermedá alicare y pudiere realizase l’actividá na primavera del cursu siguiente, apautando la devolución del dineru en casu contrariu. Un añu dempués, siguiendo les restriciones derivaes de la pandemia y llegáu el día 23 de xunu de 2021, por tanto, rematáu’l plazu qu’axusto la mesma empresa SYG pa la devolución del dineru, esta nun lo fixo.

De magar, los afeutaos solicitaron en numberoses ocasiones, por aciu mail a la empresa citada, el reembolsu íntegru ya inmediatu del preciu pagu pol viaxe, ensin que la empresa devolviere esa cantidá. Nun contesten al teléfonu qu’apurren na so páxina web, per otra parte activa, y nel meyor de los casos respuenden con mails xenéricos dando llargues, nuna situación que se allarga dende hai más de venti meses.

La empresa, pela so parte, sigue cola so actividá comercial, espublizando y realizando ensame d’actividaes, como pue derivase de les sos espublizaciones en redes sociales.

Redaición InfoAsturies

This work is licensed under a Creative Commons Attribution 4.0 International License.