El 24 d’agostu de 1937 los asturianos independizábense de fautu de la República Española, proclamando’l Conseyu Soberanu d’Asturies y Llión, entamando un procesu hestóricu que-y valió  la so reconocencia a nivel internacional, enfrentándose al exércitu franquista español y a los sos alliaos alemanes ya italianos. Sicasí, el so valor nun valió pa que los asturianos algamaren el respetu nin l’aprebación de la República española, qu’antepuso esplícitamente la xunidá d’España a la llucha antifacista, llegando a pidir la rendición y a considerar un alliviu l’acupación d’Asturies poles tropes facistes.

L’actu tendrá llugar el sábadu 22 d’agostu nel Puertu Tarna. A les 10:30 xubiráse, comu vienen faciendo los caberos años, a les trincheres de L’Abidular – Filispardi y a les 13:30 tendrá llugar l’homenaxe propiamente dichu al pie del monumentu que fai alcordanza d’esta hestórica declaración que dio aniciu a la cabera istitución democráticamente escoyía polos asturianos. L’homenaxe finará con una xinta popular na Fonte la Nalona a la que tan convidaos tolos asistentes.

Andecha Astur remembra que los asturianos nun tuvimos la oportunidá d’escoyer la nuesa forma de gobiernu actual, al nun poder votar siquier l’Estatutu d’Autonomía -al contrariu qu’otres fasteres del Estáu-. Pa los nacionaliegos, esti estatutu ta “descontestualizáu hestoricamente y ye sociolóxicamente ayenu a la sociedá asturiana, condergándomos a la situación de colonialismu que carecemos anguañu”.

Nuria Prendes