La xubida de los precios nun va acompañada de xubíes nos salarios, en parte pola rotura de la negociación coleutiva, ralentizao pola situación de crisis económica y sanitaria
No que va d’añu n’Asturies rexistraronse y espublizáronse namás trés nuevos convenios colectivos, con efeutos sobro 124 trabayadores, y anováronse solo 8, afeutando a 6.528 contrataos. El restu d’emplegaos y emplegaes nun pudieron axustar la so situación, con 42 convenios que remataron la so vixencia ente’l 2018 y el 2020, calteniendo dende entós les mesmes condiciones llaborales; ente les empreses que s’atopen nesta situación alcontramos dalguna tan significativa como Arcelor Mittal, o tan “esencial” como los servicios d’ayuda a casa. A nivel estatal, robláronse 11 convenios, frente a los 31 negociaos a estos altores del añu 2019 (el Covid rebaxó a 18 la cifra nel 2021).
Tocantes a la negociación salarial, non solo ta viéndose que la revisión de les tables salariales algamó solo a 27.099 trabayadores en toa Asturies -frente a los cuasi 100.000 d’otres feches-, sinón qu’inclusive estes actualizaciones de les nómines tán siendo insuficientes, con una xubida media salarial del 1’60%, claramente incapaz d’enfrentar la inflación d’un IPC que rexistró en xunetu un xorrecimientu interañal del 2’9%, con una perda de capacidá alquisitiva de los trabayadores -de los pocos que vieron actualizada la so nómina- de más d’un puntu.
La principal causa d’esti repique de los precios ye la xubida’l costu de la lletricidá, polo qu’afeuta a tola población, con especial perxuiciu pa los seutores más precarios y vulnerables.
Llucía F. Marqués
This work is licensed under a Creative Commons Attribution 4.0 International License.
