Na intervención política nel actu d’homenaxe a la Declaración de Soberanía del Conseyu d’Asturies y Llión destacóse la necesidá de recuperar la soberanía perdía como ferramienta imprescindible pa garantizar el futuru d’Asturies
Comu ca añu, la formación nacionaliega remembró en Tarna la costitución del Conseyu Soberanu d’Asturies y Llión y a los valientes que cayeron defendiendo’l frente asturianu ente los exércitos facistes.
Nesta ocasión la borrina nun permitió l’avezada xubía a les trincheres de L’Abidular- Filispardi, que foi sustituyía por una visita a les casamates de Tarna, onde s’escolingó una bandera de 35 metros cuadraos, en reconocencia del pueblu asturianu n’armes que defendió’l país frente al exércitu facista español.
Nel posterior actu d’homenaxe y ufrienda floral nel monumentu que fai alcordanza d’esta hestórica declaración tuvo llugar la intervención política a cargu de Mariano Suárez, que remembró la insistente voluntá de soberanía del pueblu asturianu, faciendo un repasu a les múltiples declaraciones de soberanía, primero frente al Reinu de Castiella y frente a España dempués. Darréu recalcó la emportancia hestórica d’esta cabera declaración de soberanía d’Asturies cola costitución del Conseyu Soberanu d’Asturies y Llión, comparándo esi intre hestóricu cola actual situación de sometimientu al traviés dún estatutu impuestu dende Madrid que mos convierte en victimes de la política española de desindustrialización y esfarrapamientu del texíu socioeconómicu y cultural d’Asturies.
Sicasí, Mariano Suárez finó’l so discursu con una nota positiva, destacando la viabilidá social y económica cola qu’Asturies cunta p’afitar el futuru colleutivu ya’l progresu social, destacando la necesidá de “recuperar la soberanía como ferramienta imprescindible p’avanzar nun proyeutu común que permita superar la situación que carecemos anguañu y garantizar la supervivencia como pueblu y avanzar haza una sociedá más xusta ya igualitaria”.
Nuria Prendes
This work is licensed under a Creative Commons Attribution 4.0 International License.
