Esti sábadu proyéctase n’El Remediu -Nava- la obra audiovisual de Puru Remangu “Emburriando” protagonizada por La Güestia Roller Derby
“Emburriando” ye un curtiu documental que xira alredor de La Güestia Roller Derby, el primer y únicu equipu qu’hai n’Asturies de roller derby, un deporte de contautu sobre patines que nació n’Estaos Xuníos. Cola intención de visibilizar el esporte femenín, la marca de ropa Puru Remangu produxo esta obra audiovisual que s’estrenó’l 9 de mayu en YouTube y redes sociales y qu’esti sábadu va proyectase a les 18h nel CSA L’Apiaderu -n’El Remediu, en Nava-, dientro d’una charra que van dar xugadores de La Güestia Roller Derby.
Según el Diccionariu de l’Academia de la Llingua Asturiana, emburriar ye «facer fuercia [contra daqué o daquién pa movelu, pa valtalu]» o «ayudar [a daquién que nun s’atreve a llograr un oxetivu]», por eso Puru Remangu garró esti conceptu pa da-y forma a esti documental que fala sobre compañerismu, sororidá, autoorganización, feminismu, llucha y superación, amás d’amosar el compromisu de La Güestia Roller Derby cola cultura asturiana y col mundu rural.
Na creación de “Emburriando” participaron Puru Remangu cola idea y el guión, Feeling Movie cola realización audiovisual, Fruela 757 cola banda sonora orixinal, Aida Holgado coles semeyes y delles de les xugadores de La Güestia Roller Derby. Dende’l so estrenu, el curtiu documental tuvo cuasi 10.000 reproducciones ente les distintes redes sociales y la proyección del sábadu va ser un pasu más p’afondar na visibilización del esporte femenín.
Más qu’una marca de ropa
Con “Emburriando”, Puru Remangu avanzó na so xera de nun ser namás una marca de ropa, sinón desendolcar tou un proyectu cultural y creativu basáu en da-y puxu y visibilidá a la identidá de les muyeres asturianes dende una perspectiva feminista y innovadora. Nesti sen, amás de vender prendes de vestir, n’avientu de 2020 asoleyó’l llibru “Güeli. Histories d’amor y remangu” -que yá va pela tercer edición-, y trabaya tolos díes a traviés del so Instagram difundiendo mensaxes alredor de temátiques como’l mundu rural, la salú mental, el mediu ambiente, la conciliación o’l placer femenín.
This work is licensed under a Creative Commons Attribution 4.0 International License.
