Ya ta operativu’l teléfonu qu’atenderá a les persones víctimes d’ataques por mor de la so orientación de xéneru

El númberu 635 178 634 tará operativu les 24 horas del día, tolos díes del añu, y atenderá a los sos usuarios tantu por llamada telefónica comu por mensaxería whatsapp. Les consultes retrucaránse darréu por voluntarios de l’asociación Xega y emplegaos del serviciu, siempres con asesoramientu profesional qu’incluyirá asesoramientu sicolóxicu en casu de ser preciso.

Cualisquier persona que se considere víctima d’un delitu d’odiu por mor de la so orientación sesual o que, non siendo la víctima, conoza dalgún caso o mesmo la esistencia de dalgún fechu que puea ser consideráu agresivu, discriminatoriu, denigrante u ofensivu hacia esti coleutivu, podrá ponese en contautu con esti teléfonu.

Xega recibió nel 2019 cincuenta pidiciones d’aida en situaciones de vulnerabilidá. Nel 2020 la disminución del contautu social amenorgó esa cifra a 19. L’Asociación tamién atiende pidiciones d’información y demandes d’atención sicosocial.

La principal franxa d’edá de les persones que se dirixen a Xega alcuéntrase pente los 18 y los 25 años (41%). Nos casos de denuncies, el 69% de los casos foi la propia víctima la que se punxo en contautu, entantu que los familiares denunciaron un 15% de los casos, los trabayaores en cientros educativos el 9% ya’l 8% restantes d’otres persones conoceores de los fechos.