Integrantes de les organizaciones convocantes de la manifestamientu del 8 de Setiembre concentráronse ayeri tarde n’Uviéu pa presentar les sos revindicaciones 

“Llibres del patriarcáu”, “Solidaridá obrera”, “Soberanía Popular”, “Oficialidá”, “Llibres d’homofobia”, “Stop Precariedá” o “Xusticia y Memoria” foron dalgunes de les pancartes desplegaes polos asistentes a la concentración que, dientro la campaña “El futuru nes nueses manes”, convocaron ayeri dellos coleutivos, ente los que taben Andecha Astur, Bloque Críticu, CSI, CNT, Comité d’Asturies pola Amnistía, Mocedá Comunista y FAMYR. Tamién pudieron vese delles pancartes alusives a los principales afeutaos por conflictos llaborales vixentes, comu Alsa, La Suiza, EBHi o Modultec.

La concentración, qu’entamó na Delegación de Gobiernu y finó a les puertes de la Xunta Xeneral, foi el disparu de salida pa les movilizaciones convocaes por estes organizaciones de cara al 8 de septiembre. En concreto, anuncióse el manifestamientu que se cellebrará en Xixón na mañana del miércoles 8, con salida a les 12:30 de la Plaza l’Humedal, baxo’l llema “Asturies, el futuru nes nueses manes”.