L’Asturies más revindicativa tien claro que’l país, si la so xente lo llucha, tien per delantre un bon futuru
El manifestamientu, que tendrá llugar mañana a les doce y media con salía de la Plaza l’Humedal de Xixón, ta convocáu baxo’l llema “Asturies, el futuru nes nueses manes”. Les organizaciones que llamen a salir a la cai, Andecha Astur, Bloque Críticu, Corriente Sindical d’Izquierda, CNT, Comité d’Asturies pola Amnistía, Mocedá Comunista, FAMYR, Nora Antifa asina como persones a títulu individual, destaquen pol so compromisu por Asturies y la so llucha d’años n’estremaes estayes polos drechos del pueblu asturianu. Asina alcontramos formaciones cientraes en cuestiones llaborales, sociales, hestóriques, mediuambientales, de mocedá, llingüístiques, memorialístiques, soberanistes, polos drechos civiles o implicaes en toos estos temes. Coinciden toes en querer un bon futuru p’Asturies y tar dimpuestes a dar la cara p’algamalu.
Ayeri presentaben públicamente en rueda de prensa la convocatoria de manifestamientu, afalando a tola población d’Asturies a allonxase d’actos con conteníu relixosu, folixeru o ermu de conteníu y averase a Xixón “Pa nós esta fecha nun ye un díi de folixa, nin de vírxenes, nin de rutines democrátiques de salón, nin de publicidá istitucional, nin de pleitesíes… l’ochu setiembre nós cellebramos con arguyu’l Díi de la Nación Asturiana, el díi d’esti Pueblu, una xorná vindicativa de la clas trabayaora d’esta tierra. Porque, de verdá, sintimos que, anque’l sistema lo tarreza dafechu, el futuru ta nes nueses manes”.
Nuria Prendes
This work is licensed under a Creative Commons Attribution 4.0 International License.
