XEGA emite un comunicáu énte los recién acontecimientos y llama a la concentración güei, vienres 10 de setiembre, a les 19.30 na Plaza Mayor de Xixón “Usar esti casu -la falsa denuncia d’un ataque homofóbu- como arma refundiza ye tamién xuna forma de callar la llexitimidá de les nueses lluches”

De primeres, recuerden que les movilizaciones que vienen realizando nos últimos meses, magar se sofiten en sucesos concretos, nun pueden estrayese del contestu social xeneral que se ta viviendo. “Concentrámonos non solo por un casu, sinón por toles espresiones de lgtbifobia, poles mediatizaes y poles que nun lo son tantu”.
Nel añu 2020 según los datos ufiertaos pol Ministeriu del Interior produxéronse’n tol Estáu 277 delitos d’odiu rellacionaos cola orientación sexual y cola identidá de xéneru, númberos qu’espeyen la vulnerabilidá ya inestabilidá a la que’l colectivu LGTBIA+ s’enfrénta cotidianamente.
Amás, según señala l’Axencia Europea de Drechos Fundamentales, la inmensa mayoría de los delitos d’odiu nun son denunciaos, polo que, como aportunen dende XEGA, la situación que nos amuesen los datos oficiales sigue siendo la punta d’un iceberg muncho más fondu y nel qu’otres discriminaciones pasen desapercibíes pa la llexislación vixente.
La so llucha ye la de visibilizar les estremaes violencies que carecen diariamente, pero sobremanera, por tresformar mentalidaes, por una educación inclusiva en diversidá ya igualdá, por terminar cola discriminación llaboral ya istitucional, por lleis qu’amparen el coleutivu, y por poner fin a los discursos d’odiu que siguen siendo espublizaos a cuenta de vides.
Son tamién coscientes del usu malintencionáu que se-y puede dar a un casu concretu pa cargar contra tol colectivu y contra toles persones que formen parte d’él. Denuncien l’usu como arma refundiza que se ta faciendo del recién casu d’una falsa denuncia “eso ye tamién una forma de callar la llexitimidá de les nueses lluches; ye daqué que vivimos n’otres situaciones, y ye daqué que nun frenó nin va frenar les nueses aiciones nin los nuesos esfuerzos”.

Llucía F. Marqués