Feliz regresu a la barra’l chigre

13 Setiembre, 2021

Once meses, pocu menos d’una vuelta completa al sol, esi ye’l tiempu de penitencia sanitaria que se mos fue impuesta. Once llargos meses de reducir la charra a los cuatro de la mesa, de nun cuntar col encontu afayaizu, de falar col chigreru a distancia y tener los pinchos reducios a lo que tuvieren a bien ponenos la mesa. Pero acabóse, finó por fin el supliciu ya’l pasáu vienres 10 de setiembre -fecha a remembrar- reabrieron les barres

Yo taba allí, nuna mesa del chigre, ensin decatame siquier de la hora, cuando el chigreru tocó una campana pa llamar l’atención de los presentes y, cola solemnidá que correspuende al insigne momentu, declaró que llegada la medianueche quedaba oficialmente abierta la barra. Simultaneamente salieron más pinchos de la cocina pa ser estratéxicamente espardios pela naguada barra.
Nun creyais qu’hebio una estampida de veceros, como podría esperase, a acutar el so espaciu. Dicen que 21 díes ye abondo pa camudar un vezu y nosotros llevábemos 330 convenciéndomos del pelligru de la barra.
Una especie de respigu coleutivu pasó de mesa en mesa y mirémonos de regüeyu, ente la ilusión y la medrana, pero ensin alzar el culo. Pasaron un par de menutos anantes de que la primer valiente se llevantare del sitiu y baxo la mirada de tol chigre avanzare con pasu arrechu -neto que’l mocín de les pelis de vaqueros cuando s’enfrenta a la muerte- hasta aparase a una cuarta escasa de la barra.
El mundiu contuvo l’alientu entantu la nuesa heroina asentía en silenciu al chigreru, que cumplió col so papel dando-y la espalda y descorchando nel chigre otra botella, y con decisión apoyó el coldu zorgu na barra, entanto espurría ensin mieu la mandrecha y garraba -desafiante, altiva, arguyosa- un pinchu de tortiella.
Rompióse’l fechizu ya entós si, comu obedeciendo una misteriosa llamada la naturaleza, decenes de veceros punxéronse en pie y retomaron el so llugar. Yo, personalmente, nun escaeceré enxamas el tastu d’aquella tortiella.

Llucía F. Marqués