Les I Xornaes del Vigulín Tradicional n’Asturies tendrán llugar en L’Infiestu los díes 17, 18 y 19 de setiembre de 2021
El proyeutu, presentáu hoi nel Ayuntamientu de Piloña, reivindica la tradición del vigulín nel conceyu como una seña d’identidá cultural única dientro’l panorama de la música tradicional asturiana, y ñaz cola firme voluntá de “convertir Piloña na capital del vigulín tradicional”.
La organización destaca’l bultable númberu d’intérpretes d’esti instrumentu na música popular ente’l
sieglu XIX y finales del XX (más de 60 namás en Piloña) y pretende recuperar una estaya de la música asturiana que “nun tuvo’l xorrecer que sí tuvieron otres manifestaciones como la gaita o’l baille tradicional”.
Na programación d’estes xornaes participen delles asociaciones y coleutivos tanto piloñeses como
asturianos baxo la coordinación de l’Asociación LaKadarma y l’Ayuntamientu de Piloña.
El programa d’actividaes inclúi’l I Cursu El vigulín na tradición asturiana. Repertoriu y técniques interpretatives,impartíu por Dolfu R. Fernández y Rubén Bada; la esposición El vigulín tradicional
nel conceyu de Piloña, a cargu del Archivu de la Música Tradicional d’Ambás (ATOAM); la conferencia Acercamientu al vigulín asturianu como instrumentu de tradición popular de Dolfu R. Fernández
y los conciertos de los grupos folk Caldo (Galicia) y ¿Aú? (Asturies).
Tolos detalles de la programación podrán consultase nes redes sociales del eventu.

This work is licensed under a Creative Commons Attribution 4.0 International License.