El 83% de los menores de 30 años qu’atoparon trabayu fora de Asturies ficiéronlo nel sector de la hostelería y vienta al per menor

Nel Informe del Mercáu de Trabayu de Asturies acabante espublizar pol Oservatoriu de les Ocupaciones del SEPE recuéyense 27.513 persones qu’abandonaron Asturies por motivos llaborales a lo llargo del 2020, un 32% más que nel añu anterior, pesia de les restricciones a la movilidá y al enclín al teletrabayu causaos poles circustancies sanitaries.

Nel puntu opuestu de la balanza, el númberu de trabayadores qu’entraron a Asturies mientres l’añu de la pandemia amenorgose nun 41%, desequilibrando el saldu entá más a la contra de la población residente n’Asturies.

En términos xenerales, les principales actividaes pa les que son contrataos los asturianos fuera’l país son agricultura, ganadería, caza y servicios rellacionaos coles mesmes, actividaes de costrución especializao, servicios de comíes y bébores, industria d’alimentación, actividaes cinematográfiques, de vídeu y de programes de televisión, grabación de soníu y edición musical. Sicasí costátase qu’ente los menores de 30 años el 42% de los contratos nel esterior correspuenden a servicios de comíes y bébores y a comerciu al per menor un 41%.

L’ésodu llaboral que dalgunos dieron en llamar con aciertu “xenocidiu anunciáu” tien el so principal focu d’atración n’España, pero son otros miles a sumar a estos más de 27.000 los qu’emigren a otros países, colo que les cifres d’emigración totales superen llargamente les 75 persones per día.