Cuatro barrios, toos ellos fuera de la zona cientru, tuvieron ayeri valores de contaminación qu’algamen el nivel d’alarma por partícules contaminantes PM10

Acordies los datos oficiales que facilita’l Gobiernu d’Asturies ya la Casa Conceyu de Xixón de contaminación atmosférica y calidá del aire na so web, cumpliendo la obligación que tien recoyía na Direutiva 2008/50/CE y el R.D 102/2011, foron cuatro les estaciones públiques de midición de la contaminación nes qu’ayeri saltó l’alarma pola contaminación de partículos Pm10, en concreto les del Lloredal, la Calzada, Pumarin y Montevil. Comu pue vese, estes estaciones correspuenden a barrios que nun son del cientru de la ciudá y poro, a fasteres con pocu tráficu de vehículos, lo que sofita la teoría de que l’orixe d’esta contaminación ye industrial y non, comu aporfien dende’l plenu municipal, proveniente del tráficu. 

Pente xineru y mayu en Xixón superáronse ya 66 díes los valores medios d’alarma, coles evidentes consecuencies negatives pa la salú. Los picos de contaminación atmosférica disparen los ingresos hospitalarios n’Asturies por enfermedaes respiratories, acordies l’estudiu epidemiolóxicu desendolcáu pola Conseyería de Sanidá y presentáu l’añu 2016.

La evidencia científica nun suxier dengún umbral per baxo’l que nun se prevean efeutos adversos en salú tres la esposición a les partícules. Mesmo perbaxo los niveles de calidá d’aire consideraos como seguros pola llexislación ambiental, les partícules asociense con efeutos nocivos sobre la salú, polo que la OMS recomienda reducir lo más posible les concentraciones de partícules, especialmente considerando la mayor vulnerabilidá al Covid-19 de les persones colos polmones dañaos.

Nuria Prendes

This work is licensed under a Creative Commons Attribution 4.0 International License.