La surrealista hestoria, que representa perfechamente les consecuencies de la ineficiencia de la xestión de les cercanies n’Asturies, tienlo too: la falta personal nes estaciones, les endemasiao avezaes averíes, la falta de control ya información, la desidia polo que pase en cercaníes y la total falta de rempuesta d’ADIF ante situaciones inaceutables a toes lluces
El protagonista d’esta hestoria ye, comu pidin les campañes de concienciación social, respetuosu col mediu ambiente, usa los tresportes públicos y avérase a ellos en bicicleta. D’esa miente aportó al apiaderu d’Avilés, col envís de garrar el tren con salida a les 23:01 de la nueche, utilizando la so tarxeta de tresporte pa pasar el tornu d’acesu pa pagar el viaxe de vuelta a Xixón.

Allí alcontró dos compañeros de viaxe -al menos en teoría- esperando’l mesmu tren pal que tamién pagaren billete; ún d’ellos esperaba dende les 22:30, tren que nun pasare. La megafonía anunció la llegada al anden unos menutos anantes de la hora marcada pa la salida, hasta ehí, too normal.
A las 23:01 nun aporta’l tren, na esmolecedor, FEVE nun destaca pola puntualidá, lo que ya ye de por sí problema pa los que dependen llaboralmente d’esti tresporte. 23:15, 23:20… a les 11:25 FEVE amata les lluces del apiaderu ensin que’l tren pasare. Ya va años que nun hai personal nes estaciones y naide da información por megafonía.

L’alarma de los viaxeros llega al másimu a les 23:30, cuando baxa la persiana metálica automática bloqueando toda posibilidá de salida del apeiaderu.

Resume, el tren nun pasa, presllen les puertes y tres desconocíos queden a escures nun entornu lo más asemeyao a una película de miéu. FEVE nun garra’l teléfono, un de los afeutaos llega tarde al trabayu, otru reincorpórase de vuelta n’Avilés en pocu más de siete hores.

La única solución foi saltar cola bicicleta la valla ya’l nuesu prota, quien tenía ya menos de siete hores pa entrar a trabayar na mesma ciudá de la que intenta colar, resignase a buscar aloxamientu pa esa nueche, pero compromisos personales fuércenlu a facer finalmente’l viaxe de día y vuelta a Xixón, en tasi.

Podemos maxinar en que condiciones entama la xornada llaboral.
Esi mesmu llunes interponen la correspondiente reclamación na estación Sanz Crespo de Xixón, tratando de recibir polo menos una compensación económica polos gastos xeneraos.

Na rempuesta a esta reclamación ADIF reconoz una avería nel Control de Tráficu Centralizáu d’ADIF, pero niega cualisquier compensación económica o siquier una esculpia, desixéndose-y amás el billete -inesistente por pagar con tarxeta- pa retorna-y les perres del viaxe’n tren que nunca fizo.
Somos namás unos viaxeros qu’entá resistimos n’utilizar unos servicios públicos del ferrocarril n’Asturies, cada vuelta más desatendios, con istalaciones y servicios ca vegada más obsoletos y deterioraos. Ca vuelta menos utilizaos, da dolor ver la desocupación que tienen los nuesos trenes, especialmente la FEVE, onde les incidencies y los retrasos son cotidianos y de llamentable frecuencia.
Ye vergoñosa la desatención de los servicios de Cercaníes nesti país ca vez más infrautilizaes y
agonizantes” remarca la víctima, que culpa al gobiernu d’apostar pol ferrocarril elitista (AVE) desdexando les cercanies.

This work is licensed under a Creative Commons Attribution 4.0 International License.