Los pensionistes llamen a participar na concentración que rindirá homenaxe a los protagonistes del primer empreslle que reclamó va mediu sieglu unes pensiones mínimes dignes pa los xubilaos asturianos y remembren qu’esa ye una llucha que sigue en pie

El 16 de setiembre de 1971 alrodiu de 300 xubilaos entamaba un empreslle na Ilesia de San Xosé de Xixón, col que revindicaben, pente otres coses, una pensión mínima que yos permitiere vivir, en concreto, de 5.000 pesetes, ello ye l’equivalente a unos 622 euros actuales, muy cerca de los 645,25 que correspuenden a la pensión mínima reconocía pal 2021. Tres nueve díes d’empreslle, col  sofitu de la ilesia y del entós cura, Jesús Menéndez, quien apeló al drechu al abellugu en sagrao, la policía entró a la fuercia nel templu, cargando xabazmente contra los xubilaos, siendo necesaria la posterior atención mélica de munchos y dexando incosciente a Florentino Menéndez García -Florín-, ex mineru de la Camocha. L’argumentu de la policía ye’l mesmu que se sigue utilizando agora mesmu en cargues asemeyaes, siendo acusaos de “agredir a la policía”, pesi a que tolos testigos cuenten que lo único que ficieron los presentes foi replegase en posición defensiva, ante la inesperada brutalidá del ataque. 

Tamién remembra la situación actual les multes a dellos participantes na revindicación ya’l xuiciu a los cabezaleros de la protesta, en concreto, el conseyu de guerra al que sometieron a Florín Menéndez, Mánfer de la Llera (Manuel d’Andrés) y al mesmu sacerdote. Ésti últimu foi absueltu y los xubilaos condergaos a cárcele y destierru.

El 24 d’esti mes a la 1 de la tardi, el pueblu de Xixón colos sos pensionistes a la tiesta concentraránse delantre la mesma ilesia, pa honrar la so memoria y remembrar que, salvando les distancies hestóriques “nosotros tamos na mesma situación”.

Llucía F. Marqués

This work is licensed under a Creative Commons Attribution 4.0 International License.