Les Cámares de Comerciu d’Asturies roblen un conveniu col exércitu para formar exmilitares y facilitar la so incorporación llaboral

Ye bien sabío qu’en Asturies nun hai paraos abondos a los qu’ufiertar una reinserción -o inclusive una primer inserción- llaboral a puestos de trabayu cualificaos; amás, énte’l desatamañáu remocicamientu de la población asturiana urxe la incorporación de persones n’edá cercana a la xubilación. ¿Y qué meyor aporte a la sociedá asturiana que cientos d’ex militares españoles, colos sos patrióticos y nada violentos valores? Daqué asina tuvieron de plantegase dende les Cámares de Comerciu asturianes a la de proponer esti plan, que’l presidente “socialista” Adrián Barbón cellebró como una gran idega y que va destinar los fondos europeos pa la meyora de la emplegabilidá a formar personal militar retiráu.

Concretando, el Ministeriu de Defensa español y les Cámares de Comerciu d’Asturies roblaron ayeri un conveniu pioneru pa fomentar la incorporación al ámbitu llaboral civil del personal militar retiráu, ufiertándo-yos formación dixital de baldre al traviés del Programa 45+ que desendolquen les Cámares gracies fondo europeos.

Cuando dicen pioneru refiérense a qu’Asturies ye l’únicu territoriu del estáu en priorizar a los militares sobre la so población civil a la de recibir formación y aceder a puestos de trabayu.

La capacitación qu’estos van recibir nun va ser pa trabayos de perfil físicu, nin n’hostelería, sinón de calter dixital, pa garantizar la incorporación militar a puestos informáticos onde van poder aplicar la so esmerada formación física y la so esperiencia armamentística a la xestión de datos.

Alredor de cien militares españoles podríen beneficiase añalmente d’esta formación.