Yván Pozuelo, autor del llibru Negreros o docentes, la rebelión del 10 “Al marxe, obviamente, del acosu personal al que fui sometíu mientres 22 meses d’espera pa una sentencia realmente decidía n’avientu de 2019, hai un alderique de fondu sobro educación y evaluación. Nun quixeron tenelu conmigo. Nun tengo les credenciales político-sociales riquíes n’España pa ello. Val. Nun retrucaron a denguna de les mios entrugues pedagóxiques o metodolóxiques. Val. nun vinieron falar, vinieron a castigar. Val. Tán acostumaos a amedranar esclavos. Val”

La sanción impuesta a Yván Pozuelo por aplicar la so metodoloxía educativa supón aprosimao una multa de 30.000 euros; como él mesmu fai costar “a dalgún conductor borrachu que pilló mortalmente nun-y pasó tantu”
Yván entrúgase a quién fadió tantu y considera qu’hai intereses personales nel acosu a la so llabor docente. Pesi a nun recibir denguna denuncia oficial, l’espediente del so casu ocupa 2.500 páxines “tuvieron qu’esmerarse enforma p’atopar daqué onde xustificar la caza”. Na istrucción del so casu invirtiéronse 22 meses de xixilancia y procedimientu, dende’l 18 d’avientu de 2019 dica’l 27 setiembre de 2021, un gastu escomanáu que nun ye posible desplicar dende’l puntu de vista docente, especialmente cuando nun esiste denguna quexa de parte d’alumnos nin de les sos families. Mientres esi periodu irrumpieron na so clase y na de la so compañera de departamentu ensin previu avisu y sometióse-y a cinco hores d’interrogatoriu, nes que la primer y principal entruga foi si retractaba de lo dicho na entrevista concedía a un periódicu llocal con motivu del anunciu de la presentación del so llibru “Negreros o docentes, la rebelión del diez” contra la evaluación. Refugaron les declaraciones d’alumnos y padres a favor del docente, asina comu les 7 de profesores, recoyéndose solo les 8 en contra.
Los cargos que se-y imputen son cinco: Calificar mayoritariamente con dieces “ensin xustificación y de forma inmerecíaa” al so alumnáu, negase a faer la evaluación formativa y nun programar “debidamente” les enseñances de Francés, trés faltes consideraes como bien graves y multaes con dos meses cauna. Amás, acúsase-y de nun llevar “rexistros veraces y efectivos” del rendimientu del alumnáu y nun coordinar el departamentu del que yera responsable, dambes faltes graves y penaes con un mes d’emplegu y sueldu.
Pozuelo, que va recurrir la sentencia en toles istancies posibles, denuncia qu’esto “ye una censura velada, al traviés d’una sanción bien severa, diría yo qu’histórica, como un avisu a navegantes. ¿A qué navegantes? Non a navegantes innovadores nin a gurúes, a navegantes que nun se dexen mercar nin amedranar pol poder. Lo que fixi y faigo dende fai 10 años si lu fai otru o otra próxima al poder nun tendría nengún problema, inclusive quiciabes recibiría un premiu”.

Yván denuncia amás l’abandonu del so sindicatu, CCOO, dempués de 15 años de cotizaciones, y señala la xunión de “la drechona y la izquierdona” nel so oxetivu de salvaguardar el -evidentemente fracasáu- modelu educativu actual “Non puede dexase sedar un sistema que -yos aúpa a puestos que llogren ensin méritos otros que pertenecer a tala familia política y a tala otra. Sicasí, esto non podría facelo la drechona nin la drechina, namá la izquierdona y la izquierdina son capaces de llograr asemeyada barbaridá cola complicidá de tolos dirixentes sindicales, aconeyaos nes sos llurigues. Toos ellos, a la vista de la so actuación y allugamientu, n’activu o en pasivu, paez que me fixeron trotskysta. Eso nun ye bono pa nenguna sociedá”.