La Coordinadora Ecoloxista d’Asturies presentó allegamientos al proyeutu de llei de calidá Ambiental, aduciendo que cola sida d’entainar les autorizaciones ambientales de cara a nuevos proyeutos empresariales piérdese la garantía y la participación medioambiental de la qu’anguaño se gocia
La simplificación de los trámites alministrativos, afirmen, escuende un coladeru de proyeutos ensin certificar ambientalmente. Pa ellos, lo importante pa entainar los trámites ye cuntar con una Alministracion Pública axilosa y eficaz, por aciu l’afayadiza dotación de medios y recursos a la mesma.
“Teniendo en cuenta, la precarización nos caberos años de les Alministraciones Públiques, por cuenta de retayos presupuestarios y de plantiya (por nun se cubrir les places vacantes), ensin garantizar la disponibilidad de recursos (humanos y materiales) afayaizos y abondos p’algamar un amenorgamientu efeutivu de los plazos, calteniendo o meyor entá ameyorando la calidá de los servicios públicos, el meru amenorgamientu llegal de los plazos como pretende’l Principáu va suponer necesariamente un deterioru cualitativu de los servicios de proteición ambiental”.
Poro, solicitaron oficialmente un mecanismu más eficiente que llogre una bona proteición ambiental, de la que permite amenorgar la carga de trabayu de l’Alministración Pública ambiental (dexando dedicar más tiempu y recursos a otros llabores de proteición ambiental). Esti mecanismu consistiría nel afitamientu de criterios de zonificación espacial y ordenación territorial, que dexen dellimitar zones onde nun tan permitíes determinaes actividaes humanes, pa caltener valores naturales y humanos, como son los hábitats y especies amenaciaes y la salú de les persones. Esta estratexa permite la directa inadmisión al trámite d’evaluación o autorización ambiental de proyeutos en llugares que necesariamente suponen un impautu negativu considerable pal mediu ambiente y la salú de les persones (aforrando recursos de l’Alministración Pública) y amás ye una barrera llegal que garantiza qu’estos proyeutos nun puedan superar la so tramitación ambiental, aprofitando les febleces del procedimientu.
Redaición InfoAsturies
This work is licensed under a Creative Commons Attribution 4.0 International License.
