SUATEA denuncia la falta de dotación de personal pa impartir les clases d’asturianu “Nun ye comprensible qu’un Gobiernu que diz promover la reforma del nuestru Estatutu Autonomía pa que recueya la oficialidá de les nueses llingües siga actuando activamente contra los derechos llingüísticos de la ciudadanía yá recoyíos na normativa asturiana”
Nel colexu públicu Santiago Apóstol de Mieres, cuasi el 100% del alumnáu de 4 grupos d’Educación Infantil (EI) demandaron recibir enseñances de Llingua Asturiana. La escuela lleva impartiendo estes enseñances na Educación Infantil dende hai años asgaya. Lo mesmo asocede col alumnáu d’Educación Primaria qu’escoyó mayoritariamente esta asignatura.
La dirección del centru demandó a la Conseyería Educación, yá al acabar el cursu pasáu, la necesidá de contratar a tiempu completu a un profesor/a de Llingua Asturiana p’atender a tol alumnáu qu’escoyó recibir clases d’esta área. Sicasí, solo contrató a una persona a media xornada.
Como consecuencia d’ello lleva ensin recibir clases d’Asturianu tol alumnáu d’EI dende primeros de cursu y va siguir ensin recibiles tou esti cursu si la Conseyería d’Educación nun camuda la so decisión. SUATEA denuncia qu’esta forma d’actuar ye contraria a drechu y atiende esclusivamente a criterios economicistes de recortes nel gastu a costa de los drechos de los pas y mas. Vulnera la llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu.”
Dende SUATEA denuncien esta forma d’actuar de la Conseyería d’Educación contrariamente al drechu, y sofiten la demanda de l’Asociación de Pas y Mas del Colexu y, desixendo l’ampliación de la xornada llaboral de la persona contratada pa impartir enseñances de Llingua Asturiana de media a completa pa poder atender a tol alumnáu d’EI.
Llucía F. Marqués
This work is licensed under a Creative Commons Attribution 4.0 International License.
