FAMYR convoca una recoyida de robles en change.org por que se plantegue la retirada del términu “Principado” del nome oficial d’Asturies

“N’Asturies carecemos por partida doble la Monarquía instaurada por Franco. Per un llau, la de formar parte d’un estáu que la so xefatura naide escoyó, y per otru, la denomación de Principado nel nome de la nuesa comunidá, que s’afitó nel Art. 1.2 d’un Estatutu d’Autonomía que tampoco naide votemos“. Con esi contundente párrafu ábrese la recoyida de robles cola que, en plenu alderique sobre la reforma del Estatutu d’Autonomía, la Federación Asturiana Memoria y República, FAMYR,reclama que s’esanicie la denominación de “Principado” que se-y foi impuesta a Asturies.

Destacando la voluntá asturiana de ser dueña de la so hestoria y recordando que la llucha polos valores democráticos ye una seña d’identidá asturiana “dende aquel 25 de Mayu de 1808, en que se declaro per primer vegada la soberanía popular na nuesa tierra, como afirmación d’independencia frente al invasor, pero tamién coles mires de romper amarres col antiguu réxime”, Famyr considera la denomación impuesta de “Principáu” una afenta al país.

La iniciativa yá collechó’l sofitu de Andecha Ástur, que tamién pide la firma col lema “Asturies ye nación, Principado non” desixendo que na reforma del Estatutu suma la denominación de “Principado”,  denunciando la situación predemocrática que se vive n’Asturies, “una nación con un Estatutu impuestu dende Madrid, qu’ensiquier nun reconoz drechos humanos tan básicos como la oficialidá de la nuesa llingua nacional”.

Nuria Prendes

This work is licensed under a Creative Commons Attribution 4.0 International License.